Las fòrmas ancianas son Fortia de Pasulis en 1208, Villa de Pazuls, en 1215, Villa de Pasulis en 1260, de Padullis en 1262, Castrum de Pasuls..., de Pasullis en 1262, 1298, De Pasulibus en 1308, De Padulis en 1521, Pazyols..., Pasyols en 1538, Paziols en 1781 [3].
Lo nom ven del latin palus, pus precisament de *Paludem (Dauzat e Rostaing) o *Paludes (Negre) que passa a *Padulem / *Padules per permutacion de consonantas (metatèsi) [o a lors resultats, segon la data de la metatèsi]. Dins un segond temps, lo resultat Pazuls > Pasuls (cf. la fòrma de 1215) passa a Pasuòls (Pasiòls) per diftongason coma los muls passa a los muòls (los miòls) [4],[5]. Lo vilatge es dins la val de Verdoble als ajustants d'una coma afluenta; al nòrd de la comuna, relativament planièr, d'autres rius venguts de las montanhas prèpas i passan; las sanhas s'i devián trobar un pauc pertot.
Istòria
Las primières traças de poblament dins l'airal de Pasiòls remontan al paleolitic. Foguèron trobat qualques selzes dins la Cauna dels Sants e d'autres vestigis sus la comuna de l'Edat del Fèrre, una tomba a incineracion e mai una necropòli. De fragments d'anfòras e de teules semblan indicar que l'endret èra ocupat al temps galloroman.
Durant lo sègle XII, l'espandi dependiá dels senhors de Tèrme e un fòrt de Pasiòls es mençonat en 1208. Pauc de temps aprèp la crosada dels albigeses, Pasiòls amassa amb totes los bens del senhor catar Ramond de Tèrme, foguèt autrejats al crosat francés Alain de Roucy.
Abans la refòrma cantonala de 2014, aplicada en 2015, la comuna èra del canton de Tuissan; es ara del canton de las Corbièras (canton de Fabresan abans lo 1èr de genièr de 2016).
.svg){kind=small}
