Hagedèth (Hagedet en francés) qu'ei ua comuna gascona d'Armanhac (e de Bigòrra per la diocèsi tradicionau) situada dens lo departament deus Hauts Pirenèus e la region d'Occitània, ancianament de Mieidia-Pirenèus.
La prononciacion qu'ei [haji'dèt/hajé'dèt] (grafia fonetica deus autors). Las fòrmas ancianas que son : de Fagedeto, en latin, en 1300, de Fagedeto, en latin, en 1342, de Fagadeto, en latin, en 1379, Hagedet (mapa de Cassini, a la fin deu sègle XVIII)[1].
Segon Dauzat, Hagedèth qu'ei un diminutiu de Haget, un tipe baslatin *fag-et-ellum[2].
Segon Miquèu Grosclaude, a partir deu latin fagus, « hau, hai », que s'ajustè un sufixe collectiu -etum (---> fagetum, « haget, hageda »), puish un sufixe diminutiu -ellum, donc *fagetellum, « haget petit, hageda petita »[1].