Dins lo sistèma administratiu de l'Estat francés, una region (en francés e oficialament: région), es una collectivitat territoriala de 1r nivèl, al nombre de 18, dont 13 metropolitanas (inclusa Corsega dempuèi 2019[1]) e 5 collectivitats d'otramar.[2][3]
En 2014, dins l'encastre de las reformas de reduccion de las despensas publicas promogudas pel president François Hollande, lo Parlament francés a aprovat una lei que prevesiá de reduire lo nombre de regions alara metropolitanas de 22 a 13, passant d'un total de 27 a solament 18.[4]
Cada region situada en territòri metropolitana es forma de departaments (en francés: département). Cinc regions son totalament o en partida situadas en Occitània.
La region es a l’origina una division administrativa que recampa un cèrt nombre de servicis de l’Estat. Los primièrs assages de recampar de departaments datan de las annadas 1920. En 1941, l'Estat francés crèa de prefèctes de region. De 1944 a 1946, de comissaris regionals de la Republica reprenon la foncion. Al mièg de las annadas 1950, de regions son creadas, mas lor establiment efectiu se fa en 1960. A partir de 1982, la descentralizacion fa de las regions de collectivitats localas amb divèrsas competéncias.[6]