Preishac de Navarrencs[1] o Preishac (Navarrencs)[2] (Préchacq-Navarrenx en francés) qu'ei ua comuna bearnesa administrada peu departament deus Pirenèus Atlantics de la region de Navèra Aquitània, ancianament d'Aquitània.
La prononciacion qu'ei [pre'ʃak naba'rrenks] o solament [pre'ʃak]. Las fòrmas ancianas que son Prexag au sègle XIIIau, Prexac d'arribere en 1368, Presxac en 1385, Prexac en 1385, Prexac-de-Rivere en 1548, Prechac-deça en 1675, Prechacq de Navarreins (mapa de Cassini, a la fin deu sègle XVIIIau) [3].
Segon Dauzat e Rostaing, Preishac de Navarrencs que vien deu nom latin d'òmi Priscus dab lo sufixe -acum [4]. Segon Pau Raimond, lo nom que vien deus Preciani, pòble aquitan citat per Cesar [3].
Segon Miquèu Grosclaude, l'explicacion de Pau Raimond que's basa sus ua lista de pòbles shens localizacions; de mei, lo nom deu pòble citat qu'ei Ptianii e non pas Preciani. Donc, Preishac que vien de Priscus e sufixe galloroman -iacum (« la proprietat de Priscus »). La segonda partida deu toponime qu'ei la vila de Navarrencs. En 1675, lo vilatge qu'èra aperat Prechac-deça, mentre que Preishac de Geusvath èra aperat Prexac-dela, probablament per rapòrt a Pau, lo centre de Bearn. Adara, aqueras nocions son enqüèra en usatge mès dens un sens relatiu : per cada Preishac, son vilatge qu'ei Preishac-deçà e l'aute Preishac-delà [3].