Caupena d'Armanhac[1][2],[3],[4],[5] (Caupenne-d'Armagnac en francés) qu'ei ua comuna gascoa d'Occitània situada dens lo departament de Gers e la region d'Occitània, ancianament de Mieidia-Pirenèus.
La toponimia d'aqueth lòc se pòt pas separar de l'estudi de l'omonime lanusquet. Segon Bénédicte Boyrie-Fénié, lo nom deu vilatge de las Lanas qu'ei tanben lo d'ua grana familha, sortida probablament de Caupena d'Armanhac[6], qui ei donc lo nom d'origina. Dauzat qu'explica lo nom per un mot latin inatestat, *cova, « curada, cava, cahornuda » o calva, « pelada », dab lo prelatin penna, « montanha » [7]. Negre qu'i ved l'adjectiu occitan femenin cava e pena, « arròca hauta, crèsta de montanha, escarpament »[8]. Astor, citat per B. Boyrie-Fénié, qu'explica lo nom per un compausat calv pena, vienut cauv pena, « montanha pelada a la cima » o d'un compausat cau pena qui auré lo sens d'« excavacions de la ròca » [6]. J.B. Orpustan que ved dens lo nom ua tautologia : lo prumèr element qu'ei lo de Calp, vila famosa per son ròc ([lo Penyal d'Ifac]) qui seré compausat de *kal-, varianta de *kar(r)-. L'atestacion Caupen de 1243 (per lo vilatge lanusquet) que poderé miar cap a *calp-ennu, dab elements prelatins [6]. Delamarre qu'explica los dus Caupenas per *Cauo-pennā, *Cauā-pennā, benlèu « la punta curada », mes, pr'amor lo p se consèrva dens la lenga actuala, que cau supausar meilèu un sintagme deu tipe *Cauā Pennā. *Pennā que significa « cap », mes qu'a d'autes sens derivats, oronimics (cresta). *Cauā qu'a lo sens de « la cavèca ». Lo nom de Caupena que seré donc celtic [9]. Caupena qu'ei sus ua serròta.