La Mòta Goàs[1][2],[3],[4],[5] o La Mòta Gohàs[6] (Lamothe-Goas en francés) qu'ei ua comuna gascoa d'Occitània situada dens lo departament de Gers e la region d'Occitània, ancianament de Mieidia-Pirenèus.
Mòta qu'es un mot d'origina preceltica, passat en bas latin per motta. Lo sens qu'es de « tuqueta naturala o artificiala, tuqueta tresplombada d'un castèth e per extension lo castèth » [7],[8],[9]. Virgilius Maro Grammaticus, autor deu sègle VII, que cita un exemple d'ua lenga de Bigòrra nommada la semedia : mota gelus, qui correspond a mons altus « mont haut ». Sembla que mota correspona a mons, çò que fa pensar au preceltic *motta, de sens aparentat, e que gela correspona a altus[10]. Que i a en Lomanha tarnegaronesa, ua comuna deu nom de Gohans o Gohàs o Goàs, probablament ligada a la nòsta, atestada Gofans en 1159, Goffas en 1161-62, 1199, 1269, 1271, 1277, 1352, 1702, Gofas en 1271, 1273, 1282, Goffanis en 1318, 1351, 1385, 1422, Gohas en 1339, 1640, etc, mes Goas tanlèu 1318. Segon Burgan e Lafon, que i a duas solucions. La prumèra qu'es lo vèrbe gohar « banhar en parlant deu calimàs, o alaunir, engorgar (trempar ua planta textila coma la carbe o lo lin) » [explica pas la finala]. La segonda e mei probabla qu'es un nom de persona, deu tipe Woffo o Woffi, ligats segon M. Th. Morlet au vèrbe wopjan « cridar », associat a un sufixe -anos. *Woff-anos que mia a Goha(n)s (lo passatge de w- germanic a g- qu'es constant en occitan)[11]