Castèths d'Armanhac[1][2],[3],[4],[5] (Castex-d'Armagnac en francés) qu'ei ua comuna gascoa, situada dens lo departament de Gers e la region d'Occitània, ancianament de Mieidia-Pirenèus.
Segon Dauzat e los Féniés, Castèths que veng deu latin castellum, « castèth hòrt » [6],[7], shens precision suu nombre (singular o plurau). Segon Negre, Castèths que representa lo gascon castèth « borg fortificat » au singular o au plurau[8]. Se lo nom es au plurau, s'ageish de la pluralitat deus castèths o deus poblants (*los castèths = los abitants de Castèth) ? Pr'aquò, i a ua auta possibilitat e lo plurau qu'es benlèu ua aparéncia : çò qu'escriven dab -ths o -x en francés representa benlèu la prononciacion anciana deu gascon -th, quauquarren com [-tʃ] o [-tj], atirat, avant de disparéisher, per la prononciacion enqüèra viva [-ts] e qui atau se sauvè. Lo cas que que pòt estar diferent deu de Portèths o de Castèths Andòrta, en Gasconha periferica, on l'explicacion pus probabla es un gentilici shens sufixe (*los portèths, *los castèths) qui passè après au toponime.