Sent Estèfe de Falguièras [1],[2][3] (Saint-Étienne-de-Fougères en francés) es una comuna agenesa, situada dins lo departament d'Òlt e Garona e la region de Novèla Aquitània, ancianament d'Aquitània.
Las fòrmas ancianas non son gaire divergentas : Sancti Stephani de Falgueriis (eccl. de ~), en 1120, Sancti Stephani de Falgères (capella ~), en 1326, Sancti Stephani de Falgueriis (p. ~), en 1520. La prononciacion es [,seŋtes'tɛfe de fa'ljɛrɔs] [1]. Sent Estèfe de Falièras seriá una grafia pus fonologica mas non normativa.
Estèfe es una fòrma occitana del latin Stephanus, vengut del grèc Στέφανος, « coronat ». Sent Estèfe, patron de la glèisa « jol títol de l'invencion » (festejat a la data de la descobèrta de sas relíquias, lo 3 d'agost), èra lo primièr dels martirs. Lo determinant, present dins las fòrmas ancianas, fa pensar que Falguièras es lo nom ancian del vilatge. Lo mot occitan falguièra, que ven del latin filicaria, aviá un sens collectiu : « ensemble de falguièras, donc luèc ont i a plan de falguièras » [1]. Estèfe es una fòrma mièja-sabenta que se tròba mai que mai dins los noms de glèisas e per extension de vilatges. Coma pichon nom, es la fòrma populara Estève qu'es usitada, aquí perqué es vengut un patronime (nom de familha), escrit Estève o Estèbe.