Sent Antòni de Ficalbà (Saint-Antoine-de-Ficalba en francés) es una comuna agenesa situada dins lo departament d'Òut e Garona e la region de Novèla Aquitània, ancianament d'Aquitània.
La prononciacion es [,seŋtan'tɔni de fikal'ba]. Las atestacions ancianas son contradictòrias : Ficalda, en 1309, Sancti Antonii de Fin Albano (praceptoria ~), di. Agen, en 1494, Sant Antoni de Ficualbano, en 1520. Sent Antòni, una comandariá de l'òrdre dels Antonins (que sonhavan los malaus tocats del fuèc de Sent Antòni, conegut ara coma ergotisme), remplacèt pauc a pauc Sent Martin de Peirat coma glèisa parroquiala (Peirat es a 500 m a l'èst de Sent Antòni e la glèisa a disparegut). Lo Sent Antòni onorat dins lo nom de la parròquia es donc l'anacorèta de Tebaïda, als sègles III e IV, dit Sent Antòni lo Grand. L'incertitud es pus granda sul determinant Ficalbà, apondut oficialament al nom de la comuna en 1919, « Saint-Antoine-de-Ficalba ». L'explicacion Ficus alba, « figuièr blanc » es jutjada pauc versemblabla per Bénédicte Boyrie-Fénié, que, davant la dificultat de trobar un etime, prepausa una grafia purament fonetica, Ficalbà [1],[2].