Como a maioría dos pilotos campións, correu en kartings desde os 5 anos, gañando unha sucesión de campionatos rexionais e nacionais antes de pasar a fórmulas maiores. Chamou a atención dos adestradores cando gañou o campionato Británico de Fórmula 3 en 1990, Mika uniuse ao equipo de F1Lotus en 1991.
En 1993 chega a McLaren da man do seu patrón Ron Dennis, sendo probador do equipo durante o primeiro ano. Tras a marcha de Michael Andretti aos Estados Unidos, Mika accedeu á titularidade do equipo, onde acadou o seu primeiro podio aos mandos dun McLaren con motor Ford, a finais de 1993, compartindo equipo co mítico Ayrton Senna.
En 1995, no transcurso dunha sesión de adestramentos no circuíto australiano de Adelaida, o seu McLaren Mercedes rebentou unha roda impactando frontalmente contra un muro. As asistencias sanitarias tiveron que practicarlle unha traqueotomía de urxencia salvándolle a vida. Tras recuperarse do coma no que entrou, volveu aos circuítos máis combativo que nunca, forxando ao mesmo tempo unha excelente relación afectiva co seu patrón, Ron Dennis.
En 1997 gaña o seu primeiro Gran Premio, en Xerez, e nos dous seguintes anos, 1998 e 1999, logrou inscribir o seu nome nos libros de historia ao proclamarse Campión de F1.
Logo de loitar contra o Ferrari de Michael Schumacher en 2000 e 2001, onde a escuadra italiana traballou mellor, Häkkinen tomouse a tempada 2002 "sabática", pero anunciou a súa retirada permanente durante ese ano, cedendo o seu posto ao seu compatriota Kimi Räikkönen.
En 2003 rompe a súa relación profesional co seu preparador de toda a vida, Keke Rosberg.
En 2005 conduce un AMG-Mercedes SLK 55 H.W.A. GmbH no campionato Alemán de Turismos (DTM), logrando subirse ao podio en varias ocasións, unha delas no máis alto, en Spa, Bélxica.
En 2007 repite na DTM cun Mercedes. Pero este ano será o último no que veremos a Mika Häkkinen ao volante dun coche de carreiras.
Do Grandísimo Mika Pauli Häkkinen sempre nos quedará o recordo dun gran piloto, prudente, respectuoso e todo un cabaleiro nas pistas. Quedaranos a imaxe do seu abandono en Monza, en 1999, onde, tras un erro propio mentres ía na cabeza, saíuse da pista e rompeu a chorar nunha imaxe que deu a volta ao mundo. Quedaranos un dos mellores adiantamentos da historia da Fórmula 1, o que lle fixo a Michael Schumacher en Spa en 2000, dobrando ao mesmo tempo a Ricardo Zonta, xuntándose os tres coches na pista ao final de recta.
De Mika quedaranos o recordo do seu alcume deporitvo, o "finlandés voador".
Häkkinen estivo casado con Erja Honkanen, reside en Mónaco e teñen un fillo chamado Hugo e unha filla chamada Aina Julia.
A finais de 2007 ou principios de 2008, Mika divorciouse de Erja.
Actualmente, é embaixador da afamada marca de whiskyJohnnie Walker, coa que realiza tarefas de concienciación do consumo responsable, sobre todo ao volante.
