Beurièras (Beaurières en francés) es una comuna occitana de Daufinat situaa dins lo departament de Droma e la region d'Auvèrnhe-Ròse-Aups, ancianament de Ròse-Aups.
Pichona municipalitat de la Droma situaa au fons d'una vau e traversaa per la rota dau còl de Cabre que religa Valença e Diá als Auts Aups e au Briançonés cap a Itàlia, Beurièras compta pas que 90 abitants permanents, gaire mai l'estiu, per una superfícia de 2 458 ectaras. Dos rius se renjonhon en avau dau vilatge. Lo Maravel, que ven de Forcinet, e Chaurana qu'a sa font près dau còl de Cabre.
Lo relèu d'aquela municipalitat a accidentat, e compta mai de pendas que de planas. Presat dels caçaires , dels passejaires, son territòri vast e vèrge es son punt fòrt.
Las atestacions istoricas son Beurerias (1280), Beureria (Sègle XIV), capella de Beureriis (1449), ecclesia Beati Petri de Beureriis (1509), Beureriis (1516), cura de Beurreriis (Sègle XIV), Beurières (1544), Beaurières (1576)[1].
Lo nom de la comuna es estat ortografiat per F.Mistral en nòrma mistralenca Béuriero[2]. H.Schook a mostrat una incertitud fòrta dins l'ortografa dau nom de la comuna, embe 3 fòrmas diferentas: Beurièras[3], Bèurèiras[4] e Bourièiras[5].
Segon JC.Bouvier, seriá possible que lo nom de la comuna vendriá de l'oïl beuruère, que vau dire bruièira. L'aparicion dins lo nom francés de beau seriá lo fruch d'una re-interpretacion au moment de la francizacion dau nom de la comuna[6]. Segon J.Astor, los noms de comuna Beurièras en Droma e Beurieras au Puèi de Doma derivarián de l'ancian occitan beure/bevre per lo vibre, embe per significacion "luòc frequentat per los vibres"[7].
La prononciacion locala dau nom de la comuna es [bewˈʀjɛʀɔ].