Barnava[1] (Barnave en francés) es una comuna dau Daufinat occitan, situaa dins lo departament de Droma e la region d'Auvèrnhe Ròse Aups.
Las atestacions istoricas son castrum de Barnava (1227), prioratus de Barnava (Sègle XIV), ecclesia beate Marie Barnave (1509)[2].
F.Mistral a ortografiat Barnavo en nòrma mistralenca[3]. Lo nom de comuna es estat sempre transcrich Barnava dins las revistas occitanas localas (Lo Pitron[4][5][6], Pòrta d'Òc[7]) e dins Lo Tresaur dau Dioàs de H.Schook[8].
Lo toponim apareis en Bornavo dins la reproduccion d'una carta de A.Boissier dins un numero de la revista Lo Pitron[9] embe per subjèct lo libre Lou siégé de Solliens de A.Boissier.
Dins son escritura patesejanta, embe la fòrma Bornavo, A.Boissier marcava la tendéncia coneguá en Diés de realizar lo -A- en posicion pretonica en [ ɔ ][10] (Boissier escriviá, per exemple, *Voleinço per Valença[11]). JC.Bouvier relevava dins son libre Les parlers provençaux de la Drôme paregut en 1976 qu'un polimorfisme existissiá per lo -A- pretonic, mai que la prononciacion en [ ɔ ] èra en regression e pròchi de disparéisser[12]. Lo nom de la comuna se pronóncia [baʀ'navɔ], e mai rarament [bɔʀ'navɔ]. Sa restitucion en nòrma classica pausa pas ges de problema : Barnava.