Aimue[1] (Eymeux en francés) es una comuna occitana de Daufinat situada dins lo departament de Droma e la region d'Auvèrnhe-Ròse-Aups, ancianament de Ròse-Aups.
Las atestacions istoricas son Esmers (Sègle XIII), Esmiacum (1267), Esmet, Aymuest e Aymuec (1273), Hemuscum (1293), Emuscum (Sègle XIV), Emussium (Sègle XV), Emusium (1458), Cura Eymussii (1540), Aymieu (1545), Eymussa (1549), Hémieu (1580), Ymeux (1776), Eymeu d'Hostung (1781)[2].
Lo nom de la comuna es estat ortografiat per C.Lafosse dins una expression patesejenta Emeu[3], e per F.Mistral en nòrma mistralenca Eimue[4].
Lo toponim poiriá venir de aiga e dau latin muscus (mossa)[5]. JC.Bouvier pensa que poiriá èstre lo nom d'una persona, Aimos, completat amb lo suffixe supausat gallés -eto, e qu'una substitucion de suffixe se seriá producha au cors de l'Edat Mejana[6].
Lo nom de la comuna se pronóncia [eˈmœ]. L'aflaquiment de la diftongason -ai en monoftong -e es la nòrma dins la region d'Aimue[7]. La restitucion dau nom de comuna en Aimue es adoncas corrècta. Se pòt notar tanben que, coma las oclusivas sordas devenguas finalas son tombaas dins aquela region de Droma[8], l'adopcion en occitan de la fòrma Aimuec puslèu que Aimue seriá legitima etimologicament e compatibla ambé la prononciacion locala.