Aucelon (Aucelon en francés) es una comuna occitana de Daufinat situaa dins lo departament de Droma e la region d'Auvèrnhe-Ròse-Aups, ancianament de Ròse-Aups.
Las atestacions istoricas son Aucelonum (1193), Le chastel d'Eyselon (1391), Oucello (1519), Auselon (1576), Aucellon (1644), Osselon (1727), Oscellon (Sègle XVIII)[1].
F.Mistral a escrich Auceloun, Aucelou (d)[2]. H.Schook a sistematicament utilizat la fòrma Aucelon[3][4][5]. A.Boissier a, per quant a eu, transcrich aqueu toponim sota la fòrma Ooucelou[6] dins una grafia patesejanta. D'autras atestacions escrichas son, en nòrma classica, Aucelon[7], e en nòrma mistralenca Aucelou[8].
Lo toponim seriá probablament lo diminutiu de l'occitan "aucèu" (bas latin aucellus (« pichòt aucèu »)[9].
Lo nom de la comuna se pronóncia [ɔwse'lu]. La realizacion fonetica dau diftong -au- es ben [ɔw], en coeréncia embe la transcripcion Ooucelou de Boissier e embe l'isoglòssa de realizacion dau diftong traçaa per JC.Bouvier[10]. La nasalizacion finala s'es ben escafaa, aicí tanben en coeréncia embe la transcripcion Ooucelou de Boissier, la transcripcion Aucelou en nòrma mistralenca, e embe l'isoglòssa d'escafament de la nasalizacion finala traçaa per JC.Bouvier[11]. Ensin, la restitucion dau nom de comuna en nòrma classica en Aucelon es alinhaa embe las realizacions foneticas localas.