Sent Vincenç de Pertinhàs (en francés: Saint-Vincent-de-Pertignas), es una comuna occitana deu Vasadés istoric, en Gasconha, administrada per lo departament de Gironda e la region de Novèla Aquitània, ancianament d'Aquitània.
Las fòrmas ancianas son Sancti Vincentius de Villa Partiniaco, en latin, aus sègles XI-XIII, Sancti Vincencii (parochia ~), en latin, en 1281. Lo sent eponime es un diague de l'avesque de Saragossa mòrt en 304 a Valéncia, o eventualament un monge de Lerins au sègle V [1],[2],[3]. Pertinhac es lo nom d'origina deu vilatge, basat sus un nom latin d'òme, *Pertinius, derivat de Pertinax, emb lo sufixe -acu(m) [2] , latinizacion dau sufixe gallic -acon. (Sent Vincenç de) Pertinhàs èra donc probablament una anciana granda propietat antica qu'avé per mèste *Pertinius. Mes la finala deu nom a camjat, coma plan sovent en Vasadés o en Bordalés, perqué la finala etimologica en -ac i es venguda -acs, escrita -ats en francés), o -às, coma ací (afebliment de las finalas dens los parlars libornés), segon l'esquèma : *Pertinhac (o *Partinhac, segon la fòrma daus sègles XI-XIII) ---> *los Pertinhacs (gentilici sense sufixe, los abitants de la parròquia o deu borg) ---> *Pertinhacs (lo nom de la parròquia, per confusion emb lo gentilici) > afebliment en Pertinhàs [4]. Lo nom d'origina es plan *Pertinhac, coma pensava B. Boyrie-Fénié.