Ольга Вайсбеккер

Ольга Вайсбеккер
Төп мәгълүмат
Тулы исеме	Ольга Петр кызы Вайсбеккер
Туу көне	3 сентябрь 1972(1972-09-03) (52 яшь)
Туу урыны	ССРБ, РСФСР, БАССР, Салават
Эшчәнлек еллары	1993 - х. в.
Дәүләт	ССРБ ССРБ→ РФ
Һөнәрләр	балалайкачы, педагог
Кораллар	балалайка
Жанрлар	классика, халык көйләре
Коллективлар	Анатолий Шутиков оркестры
Хезмәттәшлек	«Лепта» ансамбле
Бүләкләр
Милләт	алман

Ольга Вайсбеккер, Ольга Петр кызы Вайсбеккер (1972 елның 3 сентябре, ССРБ, РСФСР, БАССР, Салават) – музыкант (балалайкачы), Татарстан Республикасы халык уен кораллары дәүләт оркестры солисты. Татарстанның халык артисты (2018).

Тәрҗемәи хәле

1972 елның 3 сентябрендә Башкортстан АССР Салават шәһәрендә Идел буе алманнары гаиләсендә туган. Салаватта музыка мәктәбен (балалайка сыйныфы, укытучысы Шамил Хәкимҗан улы Әмиров), музыка укуханәсен (укытучысы Ольга Николай кызы Гущина), Казан дәүләт консерваториясен (1997, остазы Шәүкәт Сабир улы Әмиров) тәмамлаган. 1993 елның сентябреннән (Казан консерваториясенә керү имтиханнарын тапшыргач ук), Анатолий Шутиковның «Родник» халык уен кораллары оркестрында уйный башлый. Шуннан бирле Татарстан Республикасы халык уен кораллары оркестры солисты (балалайка-прима).

Оркестр составында барлык балалайка төрләрен җыйнаган «Лепта» балалайка ансамблен оештыручы^[1].

П. И. Чайковский исемендәге 1нче санлы Казан музыка мәктәбендә hәм 5нче балалар музыка мәктәбендә балалайка сыйныфында балаларга белем бирә^[2].

Кызы Александра Казан консерваториясе каршындагы музыка мәктәбендә скрипка сыйныфында укый.

Репертуар

Анатолий Шутиковның Халык уен кораллары оркестрында балалайканың гаҗәеп тиңдәш яңгырашын тудырган талантлы музыкант. Репертуарында 100 дән артык төрле юнәлештәге әсәр. Чит ил классик әсәрләрен, рус hәм татар халык көйләрен, татар композиторларының (Салих Сәйдәшев, Әнвәр Бакиров, Александр Ключарев h. б.) балалайка өчен эшкәртелгән әсәрләрен бердәй осталык белән башкара. Оркестр башкаруында «Полет шмеля» (Н. Римский-Корсаков), «Сказка о царе Салтане», «Болеро» (А. Шульман), «Камаринская» (Осиповлар эшкәртүендә), «Зәлидә» (А. Ключарев эшкәртүендә), «Су анасы» балетындагы (Ә. Бакиров) биюләр, Ф. Әхмәтов пьесалары, Р. Яхин әсәрләре яңгыраганда балалайка-прима партиясен башкара. Бөтенроссия hәм халыкара конкурсларда катнаша.

Бүләкләре, мактаулы исемнәре

• 2004 — Татарстанның атказанган артисты
• 2018 — Татарстанның халык артисты

Искәрмәләр

1. Лилия Аппакова. Серебряные струны 2019 елның 22 июнь көнендә архивланган.. «Республика Татарстан», 01.12.2016(рус.)
2. Ольга Иванычева. Ольга Вайссбеккер: Балалайка - это музыкальная сказка и трудовые мозоли. «Казанские ведомости», 09.12.2016

Әдәбият

1. Дина Хакимова. Ольга Вайсбеккер и её прима-балалайка. «Казань», 2016, декабрь, с. 50-54.

Сылтамалар

• Ольга Вайсбеккер 2019 елның 25 ноябрь көнендә архивланган.. Татар дәүләт филармониясе сайты
• Р. Бакиров - Бию көе. Башкаралар Ольга Вайсбеккер hәм Иван Корепанов

Моны да карагыз