Las Matèlas (Les Matelles en francés) es una comuna lengadociana situada dins lo departament d'Erau e la region d'Occitània, ancianament de Lengadòc-Rosselhon.
Situat au pè dau Puòg de Sant Lop a una quinzena de quilomètres au nòrd de Montpelhièr, la comuna es traversada per lo Lairon. L'essencial de la comuna es constituït de garrigas d'euses e de pineda. Lo vilatge vièlh data dau sègle XIIIen e se tròba en riba senèstra dau Lairon au jonhent de la Deridièra).
La prononciacion es [laz ma'telas] [corregit en [laz ma'tɛlas] (ALLOr II) [1]].
Las fòrmas ancianas son : de Matellis, sense data [sègle XII ?], 1245, territorio de Matellis, pasturalium de Matellis, honores seu nemora de Matellis, tenementum de Matellis en 1260 , pedagium Matellarum en 1266, apud Matellas, locum de Matellis en 1267, apud Matellas en 1303, Guillelmo de Manso de Matellis en 1309, ville de Matellis en 1329, prior de Matellis en 1391, las Mathellas en 1520, de Matelis en 1529, 1550, les Matelles en 1526, 1563, 1622, 1626, 1648, 1740-60, les Mattelles en 1740-60, paroisse des Matelles, le Bourg des Matelles en 1740-60, les Matelles en 1770-71 (mapa de Cassini)[2].
Segon Dauzat e Rostaing, Las Matèlas seriá un diminutiu dau preindoeuropèu *matta, « forèst » (Bertoldi), « boisson, mata, bartàs » (Alessio)[3]; segon Hamlin, Las Matèlas es un diminutiu de l'occitan mata « boisson, boscatèl, barta, bartassanha » (ALLOr, I, 239) , mot d'origina preindoeuropèa, amb lo sufixe diminutiu -èla (Hamlin escriu -ela)[2].