PROFILBARU.COM

Антички театар
Антички театар
	Театарот во 2014 г.
Општи податоци
Вид	[[а театар]]
Стил	римска архитектура
Адреса	Стар град
Град	Охрид
Земја	Македонија
Почната	III век п.н.е.
Обновена	1960; 1999
Сопственик	Министерство за култура
Други податоци
Седишта	5.000

Антички театар — римски театар и археолошко наоѓалиште од крајот на III век до почетокот на II век п.н.е. во градот Охрид, Македонија.

Местоположба

Античкиот театар е сместен во подножјето на источната косина на повисокиот охридски рид, под Самоиловата крепост, во непосредна близина на еден од главните влезови во Стариот град, Горна Порта.^[1]

Историја

Театрот е изграден во старомакедонско време кон крајот на III или почетокот на II век, во стилот на доцниот хеленизам и бил наменет за прикажување на драмски, музички и поетски претстави на љубителите на театарската уметност.

Театрот бил граден по угледот на прочуените камени градби од овој вид во Грција, со богата архитектонска декорација, особено на театарската зграда која што била украсена со фриз од барелјефни плочи на кои биле изрезбани сцени од животот на боговите. На две такви мермерни плочи, кои денес се чуваат во Охридскиот музеј, претставен е богот Дионис во друштво со Музите.

Некои од тогашните градски првенци имале закупено и сопствени седишта во театарот, како Крисп и Топос како големи љубители на театарската уметност бидејќи нивните имиња сè уште стојат врежани во камените блокови од седиштата. Веднаш по римските освојувања на овие краишта во 148 година п.н.е., театарот најверојатно за исклучително кратко време бил приспособен за потребите на римскиот начин на живеење. Објектот бил преуреден во театарски простор со арена за гладијаторски борби и борби со диви ѕверови при што неколку од долните редови седишта биле урнати и на нивно место биле изградени неколку кафези за животните, а орхестрата со почесните седишта била заградена со заштитен ѕид. Подоцна во горната, надворешна зона бил изграден епитеатрон, со што капацитетот на театарот се зголемил до 5.000 гледачи.

Се смета дека со еуфоријата што настапила во почетокот на IV век од новата ера, кога Св. Еразмо Антиохиски, првиот христијански мисионер што дошол во Охрид, преобратил во христијанство 25.000 луѓе, биле разурнати сите пагански објекти во градот. Најверојатно во тие разурнувања настрадал и театарот, а материјалот од неговите седишта и другите објекти подоцна биле користени за градење на ранохристијански базилики и многу други сакрални и профани објекти.

Првите претпоставки дека во античкиот Лихнид (денешниот Охрид) постоел театар, ги дал рускиот историчар на уметноста Никодим Кондаков на самиот почеток на XX век, а веќе во текот на 1935 година, кога биле извршени првите археолошки ископувања, тие претпоставки биле потврдени и театарот бил делумно откриен. Подоцна, за време на ископувањата вршени во периодот 1959-1960 година, била одредена точната локација и големината на театарот.

Со систематските ископувања, започнати во 1977 и по прекин од шест години продолжени во 1984 година, пронајдени се местата каде што се наоѓаат влезовите и театарската зграда, орхестрата со почесните седишта и протегањето на арената, а откриени се и девет редови од седиштата.

Во текот на 1999 година започнал проектот за негово целосно откривање и ставање во функција, а од 2001 година на сцената на отворениот реконструиран простор на античкиот театар повторно, по дваесет векови, се одржуваат драмски претстави, музички приредби и разни други манифестации.