Antón Patiño Pérez

Para outras páxinas con títulos homónimos véxase: Antón Patiño.

Antón Patiño Pérez

Biografía
Nacemento	1 de xaneiro de 1957 (67 anos) Monforte de Lemos, España
Actividade
Ocupación	pintor, escritor
Membro de	Grupo Atlántica
Xénero artístico	Ensaio e poesía
Familia
Cónxuxe	Menchu Lamas
Fillos	Lois Patiño
Pai	Antón Patiño Regueira

Antón Patiño Pérez, nado en Monforte de Lemos o 1 de xaneiro de 1957, é un pintor e escritor galego, coñecido polo seu papel como membro fundador do Grupo Atlántica e a súa obra individual.^[1] É vicepresidente do Círculo de Bellas Artes de Madrid e presidente de VEGAP.^[2][3]

Traxectoria

Participou na creación da revista Loia (1974-1978) con Manuel Rivas e os irmáns Xosé Manuel e Lois Pereiro.^[4] Colaborou xunto a Menchu Lamas no deseño dos libros do grupo poético Rompente (1978-1980), formado por Alberto Avendaño, Antón Reixa e Manolo Romón,^[4] e foi membro fundador do Grupo Atlántica, chave na escena pictórica galega dos anos oitenta. Foi membro do consello de redacción da revista de arte e pensamento Microfisuras (1997-2003).^[5]

Estabelecido en Madrid, participou activamente como pintor na renovación da arte española na década dos oitenta, como parte de Atlántica e a través da súa inclusión en mostras como 26 Pintores/ 13 Críticos, En el Centro, Periferias, Kunst Aus Spanien, Por la Pintura, Venti Anni Dopo, Los Años Pintados, Tránsito de ideas. Arte en España (1972-1992), Junge Spanische Kunstler, Zeitgenossische Kunst IM a 11 e Spansk Egen-Art.^{[Cómpre referencia]}

Expuxo individualmente en España e internacionalmente, e a súa obra atópase nas coleccións do MNCARS, MACBA, CGAC, Fundación La Caixa, MEIAC ou Artium.^[6]

Patiño con lenzos a gran tamaño.

Obra

Pintura

A súa obra pictórica ten un carácter sensorial e mestura elementos matéricos e simbólicos, incorporando con frecuencia oposicións e antagonismos. Nos seus inicios achegouse ao expresionismo abstracto, dando especial importancia á cor, pero nos oitenta comezou a realizar cadros de gran formato e forte carga conceptual. A presenza destas dúas dimensións na súa obra levou ao crítico Donald Kuspit a describila como "expresionismo conceptual".^[7]

A finais dos oitenta realizou a serie Mareas negras (1989), sobre as catástrofes ecolóxicas, e o mar continuou presente en varios dos seus proxectos posteriores. Tamén ten traballado outros formatos como a banda deseñada (Esquizoide, 1978, como parte de Colectivo da Imaxe), o debuxo e o libro de artista.^[8]

En 2020 inaugurouse a mostra antolóxica Caosmos no CGAC.^[8]

Antón Patiño

Obra teórica

Patiño é autor dunha obra teórica e ensaística, centrada no mundo da imaxe e a percepción. Entre elas atópanse obras aforísticas como Xeometría líquida (1992), Mapa ingrávido (1992), que procura reflictir a incerteza e descontinuidade do presente tecnolóxico, ou Escritos de un sonámbulo (2011).^[9]

É tamén autor de monografías sobre a obra de Reimundo Patiño (1999, 2005), Urbano Lugrís (2004, 2007), Lois Pereiro (2010, 2011) e Uxío Novoneyra (2010).

Tamén impartiu cursos e conferencias en universidades e centros de arte, e colaborou en revistas como Telos, Arte y Parte, Exit-book, Minerva ou Luzes e prensa xeralista.

Libros

Ensaio

• Xeometría líquida, 1993, Positivas.
• Reimundo Patiño: a explosión dun mundo, 1999, Auditorio de Galicia.
• Urbano Lugrís, 2004, A Nosa Terra.
• Reimundo Patiño, 2005, A Nosa Terra.
• Urbano Lugrís (viaxe ao corazón do océano), 2007, Ediciós do Castro.^[10]
• Lois Pereiro. Radiografía do abismo, 2010, Espiral Maior.
• Universo Novoneyra: a poética do intre, 2010, Espiral Maior.
• Lois Pereiro: dicionario de sombras, 2011, Espiral Maior.
• Todas las pantallas encendidas, 2017, Fórcola.

Na presentación de Que hostia din os rumorosos? (Rompente) da Libraría Miranda de Bueu o 23/08/2021. Libro no que colaborou como ilustrador.

Poesía

• Océano e silencio, 2006, Deputación de Pontevedra.
• Teoría do riso, 2015, Xerais.

Libros artísticos

• Esquizoide (cómic experimental, como parte de Colectivo da Imaxe) (1978).
• Días contra fotocopias (con Antón Reixa y Menchu Lamas) (1987).
• San Collóns e outros vudús (serigrafías, con relato de Antón Reixa) (1997).
• Mapa Ingrávido (aforismos, 2005).
• Haikus da Costa da Morte (gravados, con poemas de Alfonso Armada) (2007).

Obras colectivas

• Hai suficiente infinito, 1999, Xerais, en colaboración con Xavier Seoane.
• Neste silencio: Arredor de Uxío Novoneyra, 2000, Noitarenga.
• Lois Pereiro en 17 voces, 2011, La Voz de Galicia.

Vida persoal

Casou coa pintora Menchu Lamas. Ten un fillo, o cineasta Lois Patiño, e unha filla, Cora.

Notas

1. Barrera, Feliciano, ed. (2002). "Patiño Pérez, Antón". Gallegos. Quién es quien en la Galicia del siglo XXI (en castelán). Santiago de Compostela: El Correo Gallego. p. 425. ISBN 84-8064-113-4. 
2. "Quiénes somos - Círculo de Bellas Artes" (en castelán). Consultado o 2023-11-20. 
3. "¿Qué es VEGAP? - Estructura". VEGAP. Consultado o 20 de noviembre de 2023. 
4. "Antón Patiño Pérez". Consello da Cultura Galega. Consultado o 2023-11-20. 
5. "Patiño, Antón (1957-)". Fundación Juan March. Consultado o 2023-11-20. 
6. "Antón Patiño - Afundación". Afundación. Consultado o 20 de noviembre de 2023. 
7. "Antón Patiño - Afundación". Afundación. Consultado o 20 de noviembre de 2023. 
8. "Caos matérico: el CGAC repasa la trayectoria de Antón Patiño". Masdearte (en castelán). 2020-07-02. Consultado o 2023-11-20. 
9. Estévez, José Luis (2012-08-18). "Antón Patiño mezcla ensayo, microrrelatos y poesía". El País (en castelán). ISSN 1134-6582. Consultado o 2023-11-21. 
10. Traducido ao castelán no 2008 como Urbano Lugrís. Viaje al corazón del océano, publicado en Nigra Trea.

Véxase tamén

Wikimedia Commons ten máis contidos multimedia na categoría:  Antón Patiño Pérez

Bibliografía

• "Patiño Pérez, Antón". Dicionario biográfico de Galicia 3. Ir Indo Edicións. 2010-2011. p. 69. 
• "Patiño, Antón". Gran Enciclopedia Galega (DVD). El Progreso. 2005. ISBN 84-87804-88-8. 
• Barrera, F., ed. (2002). Gallegos. Quién es quien en la Galicia del siglo XXI. El Correo Gallego. p. 425. ISBN 84-8064-113-4. 

Outros artigos

• Antón Patiño Regueira (pai)

Ligazóns externas

• Antón Patiño Pérez na Colección Afundación.
• Antón Patiño Pérez no Museo Nacional Centro de Arte Reina Sofía.
• Pintores de Galicia (2013). TVG. Intervén Díaz Pardo, Marisa Sobrino, Xosé Antón Castro e Antón Patiño.