Vilaĝo Budislav situas en Ĉeĥio, regiono Pardubice, distrikto Svitavy, ĉe la ŝoseo n-ro 359 inter Litomyšl kaj Proseč, 5 km oriente de Proseč kaj 8 km okcidente de Dolní Újezd. Vivas ĉi tie 508 loĝantoj (2024). Ĝi estas pentrinda vilaĝo kun originaj domoj sur rando de areoj de čarmaj sabloŝtonaj rokaj figuroj nomataj Maštale (Toulovcovy maštale kaj Městské maštale). Vavřinec Toulovec, kies nomon parto de la areo portas, estis riĉa burĝo en Litomyšl en la fino de 14-a kaj la komenco de 15-a jarcentoj, al kiu apartenis vilaĝoj Budislav, Jarošov, Mladočov kaj Desná.
La najbaraj municipoj de la setlejo estas Jarošov, Lubná, Proseč, Poříčí u Litomyšle kaj Chotěnov.
Antaŭ la jaro 1824 devis katolikaj infanoj el Budislav viziti lernejon en Mladějov kaj evangelianaj infanoj lernejon en Proseč. Ĉefe en vintraj monatoj, kiam la vojo estis malfacila aŭ iam eĉ danĝera, jam antaŭ la jaro 1824 oni instruis la infanojn legi, skribi kaj kalkuli sen aprobo en Budislav. En la jaro 1824 estis al la vilaĝo lernejo aprobita, oni plu instruis en privataj domoj sed jam en la jaro 1844 estis en la vilaĝo konstruita nova lerneja domo
En la jaro 1828 komencis produktado en vitrofarejo Marienwald en Posekanec. Oni produktis diversajn vazetojn - kruĉojn, glasojn, cukerujojn, salujojn, korbetojn en diversaj koloroj, simplajn kaj kristalajn. Estis produktata ankaŭ rara rubena vitro enhavanta fanditan dukatan oron. Tamen post kverelo inter posedanto de la fabriko kaj ĝia faka estro en la jaro 1872 produktado malkreskis kaj baldaŭ estis tute ĉesigita.
Legendo rakontas, ke muelisto el Budislav faligis kontraŭleĝe grandan liman abion. Ĉe la faro kaptis lin arbargardisto kaj la muelisto estis kondamnita porti duonon de peza muelŝtono de sia muelejo al la loko kie la krimo estis farita. Tiel okazis, sed la muelisto pro tuta senfortiĝo sur la loko mortis. La loko, kie tiu tragedio okazis, estis signita per ligna kruco datita 1749. La kruco estis pli poste novigita kaj en loko nomata "Ĉe la muela ŝtono" ĝi ankoraŭ nun staras.