Lo Cap de Ferrat e la vila de Sant Joan de Cap Ferrat
Sant Joan de Cap Ferrat es situat sobre la Còsta d'Azur, tra Niça e Mónegue, a la broa de la mar Mediterranèa. Lo territòri de la municipalitat se situa tra Vilafranca de Mar e Bèuluec ; compren la totalitat de la presqu'ísola dau cap de Ferrat e tanben, sobre la còsta èst d'aqueu darrièr, la poncha de Sant Ospici siá a pauc près de 250 ectaras. Es ocupat per 500 villas, la majoritat fòrça luxuoi, estofadi sota li flors, li palmeras, lu pins d'Alèp, lu oliviers. Tra li villas chelèbri, si compta la villa Ephrussi-Rothschild donada a l'Estat en l'an 1934. Lo luec es classat e lu bastiments nòus son fòrça susvelhats[2]. Aquò empacha pas, despí lo començament deis ans 2000, lu rics proprietaris d'efectuar de multiples trabalhs amb o sens autorizacion e de còps au mespretz de la lei dau litoral. Li associacions localis de defensa de l'environament multiplicon lu recors dau temps que lo cònsol sosten lu bastiments que respècton li nòrmas d'urbanisme per rasons economiqui[2].
Istòria
Ancianament Anao, lo site de Sant Joan de Cap Ferrat foguèt inicialament ocupat dai ligurs, pis dai lombards vèrs 575. Au començament de l'Edat Mejana, lo reclus sant Ospici l'i ocupa una torre sus la part èst de la presqu’ísola. Au sècolo VIII, lu sarrasins conquistèron lo luec; nen seron pas delotjat qu'au sècolo XI.
En lo 1388, au moment de la dedicion dau comtat de Niça, lo masatge de Sant Joan, que faía partida de la comuna de Vilafranca, tornèt au ducat de Savòia. Lo site foguèt fortificat sota protectorat savoiard ; en lo 1561, sota lo règne de Emanuèl Filibèrt de Savòia, lo fòrt Sant Ospici foguèt bastit. Serà pis destruit en lo 1706 dau duc de Berwick, a l'escasença de la presa de Niça per França.
Sant Joan passèt mai d'un còp sota ocupacion francesa entre 1720 e 1820 ; foguèt definitivament restacat a França en lo 1860 amb l'ensems dau Comtat de Niça.
En lo 1904, lo masatge de Sant Joan se separa de Vilafranca de Mar e ven una comuna a part entièra. D'en premier nomenada Sant Joan de Mar, la comuna prendrà lo nom de Sant Joan de Cap Ferrat en 1907.
Ancuèi, Sant Joan de Cap Ferrat es lo un dei principals luecs residencials de la Còsta d'Azur, amb de nombroi e luxuoi proprietats.
.svg){kind=small}
