Belize is de gröttste Stadt in dat Land Belize un weer bet 1970 ok de Hööftstadt (nu Belmopan binnen in’t Land). De Stadt hett so 70.800 Inwahners (schätzt, 2005). Se liggt op en Halvinsel an’n Stroom Belize an de Küst von de Karibische See. Dat is ok de wichtigste Haven un Weertschopsstandoort von dat Land.
Geschicht
Belize is so bi de Midd von’t 17. Johrhunnert von brietsche Holtfällers grünnt worrn. Dör de Laag an de Küst an de Münn von Stroom Belize (an’n Haulover Creek, een von de Arms von de Belize-Münn) dee sik de Oort anbeden. Dat Mahagoni un annere Eddelhölter de binnen in’t Land slagen worrn sünd, kunnen över den Stroom an de Küst flött warrn. Vör de Briten harrn al de Maya an de Steed en lütte Stadt, de Holzuz heten harr.
An’n 10. September 1931 is de Stadt swoor von’n groten Hurrikan von 1931 drapen worrn, bi den an de Küst von dat Land Belize so 2500 Lüüd doodbleven sünd, en groten Deel dorvon in de Stadt Belize. Ok 1961 wedder is de Stadt von en Storm drapen worrn, ditmal an’n 31. Oktober de Hurrikan Hattie, de en groten Deel von de Stadt överswemmt un toschannen richt hett. Dat weer ok een von de Grünn mit, dat 1970 Belmopan de Hööftstadt worrn is, dat binnen in’t Land liggt.
Panorama över Belize von üm un bi 1914Blick över de Stadt (2008)
De Inwahners weren bi’n Zensus 2000 to to 61 % Kreolen, 22 % Mestizen, to 6 % Garifuna un to 4 % Inders. De Rest hett sik op de verscheden annern Volksgruppen von Belize opdeelt.[2]
De beiden wichtigsten Straten sünd de Philip Goldson Highway, de na Noordwesten löppt un de George Price Highway, de na Süüdwesten löppt un Belize mit Belmopan verbinnt.
