მონროვია

დასახლებული პუნქტი
მონროვია ინგლ. Monrovia
დროშა
ქვეყანა	ლიბერია
კოორდინატები	6°18′38″ ჩ. გ. 10°48′17″ დ. გ.
დაარსდა	25 აპრილი, 1822
ფართობი	194.25 კვადრატული კილომეტრი
მოსახლეობა	1 021 762 (2008)
სასაათო სარტყელი	UTC+0
მონროვია ვიკისაწყობში

მონროვია (ინგლ. Monrovia) — ლიბერიის დედაქალაქი, მონტსერადოს საგრაფოს ადმინისტრაციული ცენტრი. გაშენებულია ატლანტის ოკეანის სანაპიროზე, მდინარე სენტ-პოლისა და მესურადოს შესართავში. გამოიყოფა დიდი მონროვიის რაიონი, სადაც 2008 წლის აღწერის მონაცემებით ცხოვრობდა 970,824 ადამიანი,^[1] შესაბამისად, მასზე მოდის ქვეყნის მოსახლეობის 29%. მონროვია ლიბერიის ყველაზე მჭიდროდ დასახლებული ქალაქია.^[2] ქვეყნის მთავარი კულტურული, პოლიტიკური და ფინანსური ცენტრი, ამასთანავე ძირითადი სავაჭრო ცენტრი და დიდი ნავსადგურია. ეს უკანასკნელი განსაკუთრებით გაფართოვდა მეორე მსოფლიო ომის (1939-1945) დროს ამერიკელების მიერ. ნავსადგური გამოიყენება გემების სადგომად და მათ შესაკეთებლად. ექსპორტზე უმეტესწილად გააქვთ რძეწვენი და რკინის მადანი. ადგილზევე მზადდება ცემენტი, აგური, სხვადასხვა ქიმიური ნივთიერებები, კვების პროდუქტები და სხვა.

ქალაქი დაარსდა 1822 წელს აშშ-იდან გადმოსახლებული ზანგების მიერ და სახელი ეწოდა ამერიკის პრეზიდენტის ჯეიმზ მონროს პატივსაცემად. 1847 წლიდან ლიბერიის რესპუბლიის დედაქალაქია. საგანმანათლებლო ცენტრი. მონროვიაში არის ლიბერიის სახელმწიფო უნივერსიტეტი და აფრიკის მეთოდისტური საეპისკოპოსო უნივერსიტეტი, სტელა-მარის პოლიტექნიკური სასწავლებელი და სხვა მრავალი. სამედიცინო განათლების მიღება შესაძლებელია სამედიცინო კოლეჯში.

არქიტექტურული შენობებიდან საყურადღებოა კაპიტოლიუმი (1958), აღმსასრულებელი სახლი (1964), მუნიციპალიტეტის შენობა და სხვ. ქალაქში არსებული მრავალი შენობა-ნაგებობა ძლიერ იყო დაზიანებული სამოქალაქო ომის დროს 1990-იან წლებში.

ჰავა სუბეკვატორულია. იანვრის საშუალო ტემპერატურა უდრის 26,5°C, ივლისის 24,2°C. ატმოსფერული ნალექების რაოდენობა დაახლოებით 4000 მმ წელიწადში. კლიმატურ პირობებში გამოიყოფა მწვიმიანი და მშრალი სეზონები.

მონროვია აგრეთვე წარმოადგენს ლიბერიის მთავარ სატრანსპორტო კვანძს. არის საერთაშორისო მნიშვნელობის აეროპორტი.

რესურსები ინტერნეტში

• ქალაქი მონროვია – ენციკლოპედია ბრიტანიკა (ინგლისური)

სქოლიო

1. 2008 National Population and Housing Census დაარქივებული 2012-02-13 საიტზე Wayback Machine. . Retrieved November 09, 2008.
2. Global Statistics. GeoHive (2009-07-01). ციტირების თარიღი: 2010-07-04.