Assad Shoman (* 13. Februar 1943 in Belize-Stadt) is en Politiker ut Belize (PUP), de ok as Historiker aktiv is.
Tohoop mit Vernon Harrison Courtenay, Said Musa un C. L. B. Rogers warrt he as een von de Vaders von de Verfaten von Belize ansehn, de 1981 beslaten worrn is.[1]
Leven
Shoman is 1943 as Söhn von en christlichen Palästinenser, de ut Beit Hanina stammen dee, un en Moder ut en Maya-Familie in Belize-Stadt boren.[2][3] 1964 un 1973 hett he de Heimaat von sien Vader besöcht.[2] He is de Unkel to Lisa Shoman.[2]
Shoman hett an de University of London Juristeree studeert.[4] Na dat Studium keem he in’n Oktober 1968 na Brietsch-Honduras trügg un hett för de Regeren von Belize arbeidt.[4] To de eersten Akschonen trügg in sien Heimaat hett höört, dat he tohoop mit Said Musa dat Ad Hoc Committee For The Truth About Vietnam inricht hett.[4] 1969 hett he tosätzlich tohoop mit Musa dat People’s Action Committee (PAC) grünnt.[4] Dat PAC is in’n Oktober 1969 mit de United Black Association for Development (UBAD) tohoopgahn un hett dat Revolitical Action Movement (RAM) billt, wat aver blots bet Januar 1970 anhollen hett.[4] In düsse Tied hett Shoman sien Arbeid bi de Regeren verloren un hett anfungen, as Avkaat to arbeiden.[4]
Vondaag leevt Shoman vör allen in Havanna, Kuba.[4] Blangen siene Arbeid in de Politik hett he en Reeg Böker rutbröcht, in de he sik mit de Geschicht von Belize uteneensett.
Politik
Shoman is to Anfang de Johren 1970 in de PUP intreden.[4]
Bi de Parlamentswahl 1974 weer he för de PUP Kannedaat in’n Wahlkreis Cayo Noord un hett mit 46,6 % von de Stimmen gegen Joseph Andrews von de UDP verloren. Premierminister George Cadle Price hett em denn aver in de Wahlperiood von 1974 bet 1979 as Senater in’n Senaat von Belize beropen.[4] Ünner Price weer he Generaalstaatsanwalt un Staatsminister för Internatschonale Betehungen in dat Butenministerium.[5] Bi de Wahl 1979 weer he in’n Wahlkreis Cayo Noord wedder Kannedaat un hett dütmaal mit 51,4 % von de Stimmen gegen Andrews wunnen.
He weer von 1979 bet 1984 Minister för Gesundheit, Huusbo un Kooperativen ünner Premierminister Price. Shoman güll as Sozialist un weer en Anföhrer von’n linken Flögel von sien Partei.[6] Bi en Richtungskampf in de Partei 1984 hett sik de rechte Flögel dörsett un Shoman hett keen wichtige Posten mehr kregen.[6]
Bi de Wahl 1984 is he in’n Wahlkreis Cayo Zentraal as Kannedaat antreden un hett 43,5 % von de Stimmen haalt. Dormit kunn he sik nich gegen Eduardo Juan von de UDP dörsetten.
1993 weer he för korte Tied Baadschopper in Mexiko. Von 1998 bet 2002 weer Shoman Hoochkommissar von de Hoge Kommission von Belize in London (vergliekbor mit en Baadschopper). Düt Amt weer gliektiedig ok verbunnen mit dat Amt as Baadschopper för verscheden europääsche Länner (Belgien, Frankriek, Düütschland un Spanien)[3], Assad sien Seet weer aver in London.
Ünner Premierminister Said Musa is he 2002 wedder in’n Senaat von Belize beropen worrn.[5] He weer von’n 4. Januar 2002 bet 2003 Butenminister von Belize. 2003 is he denn in Belmopan Baadschopper mit Ministerrang worrn un weer för’n Grenzkunflikt twüschen Belize un Guatemala tostännig. Tosätzlich is he von 2003 bet 2004 ok Baadschopper för Belize in Kuba ween.[3]
An’n 18. August 2004 hett he ünner Musa dat Amt as Minister för Natschonale Entwicklung övernahmen, wat he bet 2005 bleven is.[3] Dormit he düt Amt övernehmen kunn, is he von Musa in’n Senaat beropen worrn. He hett den Seet von Therese Rath övernahmen.
An’n 8. Mai 2019 hett dat in Belize en Referendum geven över de Fraag, wat de Internatschonale Gerichtshoff in Den Haag över den Grenzkunflikt twüschen Belize un Guatemala en Seggen hebben schall. Belize hett sik dor för utspraken. Datsülve harr vörher al Guatemala daan. Dormit weer kloor, dat de Kunflikt vör dat Gericht geiht. Dorüm hett de Regeren von Belize Shoman wedder as Baadschopper insett, de de Intressen von Belize bi dat Gericht vertreden schall.
Warken
- Party politics in Belize. Cubola Productions, 1987, ISBN 9686233024
- Thirteen Chapters of a History of Belize. Angelus Press Limited, 1994, ISBN 9768052198
- Backtalking Belize: selected writings. Angelus Press Limited, 1995
- Reflections on Ethnicity and Nation in Belize. 2010
- Belize’s Independence and Decolonization in Latin America: Guatemala, Britain, and the UN. Palgrave Macmillan, 2010, ISBN 1349382930
- Guatemala’s Claim to Belize: The Definitive History. Cloned Prose Publishing, 2018
- ↑ Chronological History of Belize Constitution
- ↑ a b c Nathan Guttman: From El Bireh to Belize, Haaretz an’n 1. Oktober 2001
- ↑ a b c d Indrag op rulers.org
- ↑ a b c d e f g h i Bill BRICS attacks Havana Assad, Amandala an’n 19. April 2016
- ↑ a b Shoman sworn in as Foreign Minister, Channel 5 Belize an’n 4. Januar 2002
- ↑ a b Castro’s Cuba and Price’s Belize, Amandala an’n 30. November 2016
