London is de Hööftstadt vun England un vun dat Vereenigte Königriek vun Grootbritannien un Noordirland. De Stadt liggt an'e Themse in Süüdoostengland. An'n 1. April1965 is Greater London (Platt:Groot-London) grünnt wurrn. Greater London hett siet de Tiet en gemeensam Verwalten. In dat Johr 2006 leven dor 7.512.400 Minschen up 1.579 km², dor mank sünd 2.972.900. de in de 13 Stadtbezirken vun Inner London wahnt. In de Agglomeratschoon vun London leven in dat Johr 2001 8.278.251 Inwahners.
London liggt över 45 km langs den Themse-Stroom, wo Schipperee up bedreven warrt. In'n Dörsnitt liggt de Stadt 15 m över NN. De Anfang vun de Stadt lä in en Wohnsteed in'n Noorden vun de Themse, in de hüdige City of London. Ut düssen Grund liggt de gröttere Deel vun de Stadt noch hüdigendags in'n Noorden vun de Themse. Bit 1739 weer de London Bridge de eenzige Brugg över den Stroom. As in dat 18. un 19. Johrhunnert annere Bruggen un de Iesenbahn boot wurrn sünd, is de Stadt na all Richtungen hen grötter wurrn. Dat Land is platt oder hett en poor Buckels. Dorüm konn de Stadt sik goot utbreden.
Fröher weer de Themse veel breder un sieder as hüdigendags. Hüüttodaad is se meist ganz mit Dämm ingrenzt un de Bäken un Fleten, de dor toströömt, liggt ünner de Eer. De Tieden vun de Noordsee her sünd in London noch düütlich to spören, dorüm gifft dat in de Stadt ok de Gefohr vun Överswemmen un Stormfloot. Bi Woolwich ööstlich vun Greenwich is in de 1970er Johren dat Thames Barrier boot wurrn. Dat is en Wehr gegen de Gefohr vun Hoochwater.
.svg)
