Theodore „Ted“ Aranda (* 1934 in Stann Creek Town - 2022) is en Politiker ut Belize (UDP, CDP, nu PUP).
Leven
Aranda is 1934[1] as Garifuna in Stann Creek Town (nu Dangriga) boren. He weer op dat St. John’s College in Belize-Stadt un hett an de Emporia State University in Emporia (USA) studeert.[1] Dor hett he en Bachelor of Arts maakt un denn tosätzlich an de University of Illinois en Master of Arts un en Ph.D.[1] Later hett Aranda för’n Belize-Aflegger von CARE International arbeidt.
Aranda is verheiraadt un hett veer Kinner.[1]
Politik
1974 is he in de United Democratic Party (UDP) intreden un weer von 1978 bet 1981 in’n Stadtraad von Dangriga.[1]
He weer bi de Parlamentswahl in Belize 1979 för de UDP Kannedaat in’n Wahlkreis Dangriga un hett dor mit 53,6 % von de Stimmen gegen Gadsby Ramos von de PUP wunnen. Dormit weer Aranda von’n 21. November 1979 bet 14. Dezember 1984 Afornten in dat Repräsentantenhuus von Belize. Dean Lindo is bi düsse Wahl nich wedder in dat Repräsentantenhuus rinkamen. Dorüm hett Lindo den UDF-Vörsitt afgeven un Aranda is ne’en Vörsitter ween. Gliektiedig is Aranda dormit Oppositschoonsföhrer worrn un weer na de Unafhängigkeit von Belize 1981 ok de eerste Oppositschoonsföhrer in’n ne’en Staat. Dat hett bet Dezember 1982 anhollen, as he den Parteivörsitt un dormit ok de Rull as Oppositschoonsföhrer afgeven hett (sien Nafolger as Parteibaas weer denn Manuel Esquivel un as Oppositschoonsföhrer Curl Thompson). En Tied later is he denn ok ganz ut de Partei rut.
1983 hett Aranda de Christian Democratic Party (CDP) grünnt un is bi de Wahl 1984 in’n Wahlkreis Dangriga för de CDP antreden. He hett blots 24,3 % von de Stimmen haalt. He leeg dormit op’n drüdden Platz achter Simeon Sampson von de PUP un Henry Anderson von de UDP. Na düsse Nedderlaag hett de CDP sik 1988 de People’s United Party (PUP) anslaten.
Bi de Wahl 1989 is he wedder in’n Wahlkreis Dangriga antreden, nu för de PUP. He hett mit 52,9 % gegen Randolph Enriquez von de UDP wunnen.
Dormit weer Aranda von’n 4. September 1989 bet 30. Juni 1993 en tweet Maal Afornten in dat Repräsentantenhuus von Belize un weer von 1989 bet 1993 ünner Premierminister George Cadle Price Minister för Gesundheit.
Bi de Wahl 1993 weer Aranda wedder för de PUP Kannedaat un hett den Wahlkreis Dangriga mit 43,6 % an Russell Garcia von de UDP verloren. Bi de Wahl 1998 dorgegen kunn he sik mit 56,81 % von de Stimmen gegen Garcia dörsetten un weer dormit von’n 27. August 1998 bet 5. März 2003 dat drüdde Maal Afornten in dat Repräsentantenhuus.
In dat Johr 2000 hett Aranda de World Garifuna Organization grünnt, de de Intressen von dat Garifuna-Volk vertreden schall. Se steiht dormit deelwies in Kunkurrenz to dat öllere National Garifuna Council.
- ↑ a b c d e The International Year Book and Statesmen’s Who’s who. Burke's Peerage Limited, 1998, Sied 672
