PROFILBARU.COM

Jeu de paume was 'n Franse voorganger van tennis wat oorspronklik sonder rakette gespeel is. Die spelers het die bal met hulle hande geslaan soos in palla, vlugbal, of sekere weergawes van pelota. Jeu de paume beteken letterlik: spel van palm (oftewel hand). Met verloop van tyd het handskoene kaal hande vervang. Selfs toe spane en eindelaas rakette in gebruik geneem is, het die naam van die spel nie verander nie. Die spel het in Engels as "tennis" bekend geword en later as "real tennis" nadat die moderne sport lawn tennis, meer gewild as die oorspronklike spel geword het.

Die term word vandag in Frankryk gebruik om na saaltennis te verwys of na 'n baan waarin die ou of moderne spel gespeel is, of gespeel word. Die binnemuurse weergawe word soms jeu de courte paume of net courte paume (kortpalm) genoem om dit te onderskei van die buitemuurse weergawe, longue paume, wat op 'n groter baan gespeel word.

'n Aantal belangrike geboue in Frankryk staan bekend onder die naam jeu de paume, merendeels weens hulle ligging naby tennisbane of plekke waar die bane vroeër bestaan het. Verskeie kunswerke dra ook die naam, insluitend die serment du jeu de paume ('die Eed op die Kaatsbaan') in die Paleis van Versailles. Dit beeld die formele aankondiging van die Franse Rewolusie uit wat op 20 Junie 1789 in die Salle du Jeu de paume afgelê is.

'n Kunsmuseum met roterende uitstallings, die Galerie nationale du Jeu de Paume, dra ook nie naam. Dit is geleë aan die noordekant van die Tuileriespark in die middel van Parys.