Euroviisuh-lávlumkišto 2025 lii 69. kerdi, ko lávlumkišto uárnejuvvoo. Kišto uárnejuvvoo Baselist, Sveeicist tondiet ko Sveeici ovdâsteijee Nemo vuoitij ive 2024 kišto, ko sun finnij finalist 591 čyegisid pitástis The code.[1][2] Kišto uárnejeh Euroop almosradiounion (EBU) já Sveeici almosradiofinnodâh SRG SSR.[3]
Semifinaleh uárnejuvvojeh vyesimáánu 13. peeivi já 15. peeivi 2025.[2] Fiinaal uárnejuvvoo vyesimáánu 17. peeivi 2025.[2] Ive 2025 lii kuálmád kerdi, ko Euroviisuh uárnejuvvojeh Sveeicist. Euroviisuh uárnejuvvojii Luganost ive 1956 já Lausannest ive 1989.
Ive 2025 Euroviisuin láá maaŋgah tábáhtussajeh: St. Jakobshalle, St. Jakob-Park, Steinenvorstadt, Barfüsserplatz já Basel messu- já kongreskuávdáš. Euroviisui uáivitábáhtussaijeen lii čohčâmáánu 26. peeivi 1976 lekkum maaŋgâtooimâareena St. Jakobshalle.[4] Areena ij lah Baselist, pic lii het-het Basel já Münchenstein rääji nubebeln.[2] Maaŋgâtooimâareenast čäähih 12 400 olmožid, já tobbeen uárnejuvvojeh ei. valastâllâmtábáhtusah já konserteh.[3]
St. Jakobshalle lasseen lii máhđulâš keččâđ Euroviisui fiinaal Sveeici stuárráámuu jyelgipállustadion St. Jakob-Park stuorrâ elektronlij vielgiskággái peht.[5][6] 36 000 olmožid čäähih stadionân, kost uárnejuvvoo Arena plus -tábáhtus. Tábáhtusân kuleh 90 minuttid pištee ovdâkonsert já ive 2025 Euroviisui fiinaal keččâm vyesimáánu 17. peeivi. Ovdâkonsertist lávdásteh Sveeici ive 2011 euroviisuovdâsteijee Anna Rossinelli, Kroatia ive 2024 euroviisuovdâsteijee Baby Lasagna já sveiccilâš muusikpyevtitteijee DJ Antoine.[5] Konsert maŋa álgá ive 2025 Euroviisui fiinaal.
Ive 2025 jođetteijei noomah piäijojii almosin uđđâivemáánu 20. peeivi 2025.[7] Baselist kišto semifinalij jođetteijen lává sveiccilâš-ovtâstumstaatâlâš komikkár Hazel Brugger já Sveeici ive 1991 Euroviisui ovdâsteijee Sandra Studer.[7] Suoi jođettává finalist-uv, mut talle kuálmádin jođetteijen lii sveiccilâš-italialâš TV-läiđejeijee Michelle Hunziker.[7] St. Jakob-Park -stadionist jođetteijen lává ovdâkonsert já fiinaal ääigi sveicciliih TV-läiđejeijeeh Mélanie Freymond já Sven Epiney.[6] Suoi meiddei almottává čuággáid, maid Sveicci lii adelâm fiinaal artistáid.[6]
Uásálisteh juáhhojii viiđâ juávkun uđđâivemáánu 27. peeivi 2025.[8] Jyehim vuáđudui ovdebij iivij jienâstmáid. Ranska, Saksa, Italia, Espanja, Ovtâstum kunâgâskodde já oovdeb ive vyeittee Sveicci pessii njuolgist finalân.
Kiišton uásálisteh ohtsis 37 staattâd. Montenegro máccá kyevti ive puudâ maŋa.[9] Ive 2024 uásálistein Moldova lii áinoo, mii ij lah fáárust ive 2025 kištoost. Moldova lâi algâaalgâst almottâm, ete tot uásálist ive 2025 kiišton, mut uđđâivemáánu 22. peeivi 2025 staatâ almosradiofinnodâh TeleRadio-Moldova almottij, ete ij uásálist.[10]
Ive 2025 Euroviisuh-lávlumkišto ovdâsteijein kyehti lává ovdil uásálistám Euroviisuid: Montenegro lávloo Nina Žižić já Puola lávloo Justyna Steczkowska.[11] Žižić uásálistij ive 2013 Euroviisuid oovtâst muusikjuávhoin Who See, já Steczkowska ovdâstij Puola ive 1995 Euroviisuin.[11][12]
Uásálisteh juáhhojii kyevti semifinalân uđđâivemáánu 28. peeivi 2025 Basel taaiđâmuseost.[13]
Vuossâmuš semifiinaal uárnejuvvoo vyesimáánu 13. peeivi 2025, já toos uásálisteh vittnubáloh enâmid.[2][13] Italia, Espanja, Sveicci já enâmeh, main ij lamaš ovdâsteijee kištoost, jienâsteh taan semifinalist. Enâmeh, moh láá love pyeremuu juávhust semifinalist, uásálisteh finalân vyesimáánu 13. peeivi 2025. Love čoođâmannee enâmid almottuvvojeh sätioornigist. Puoh semifinalist adelum jienah láá keččei jienah.
Lopâlâš lávdástâllâmoornig almostittui njuhčâmáánu 27. peeivi 2025.[14] Veikkâ Italia, Espanja já Sveicci peesih njuolgist finalân, toh-uv lávdásteh vuossâmuu semifiinaal ääigi, Italia Eestieennâm maŋa, Espanja Belgia maŋa já Sveicci Kroatia maŋa.[14]
Nubbe semifiinaal uárnejuvvoo vyesimáánu 15. peeivi 2025, já toos uásálisteh kuttnubáloh enâmid.[2][13] Ovtâstum kunâgâskodde, Saksa, Ranska já enâmeh, main ij lamaš ovdâsteijee kištoost, jienâsteh taan semifinalist. Enâmeh, moh láá love pyeremuu juávhust semifinalist, uásálisteh finalân vyesimáánu 15. peeivi 2025. Love čoođâmannee enâmid almottuvvojeh sätioornigist. Puoh semifinalist adelum jienah láá keččei jienah.
Lopâlâš lávdástâllâmoornig almostittui njuhčâmáánu 27. peeivi 2025.[14] Veikkâ Ovtâstum kunâgâskodde, Saksa já Ranska peesih njuolgist finalân, toh-uv lávdásteh vuossâmuu semifiinaal ääigi, Ovtâstum kunâgâskodde Nuorttâriijkâ maŋa, Saksa Georgia maŋa já Ranska Israel maŋa.[14]
Fiinaal uárnejuvvoo vyesimáánu 17. peeivi 2025.[2] Tastko Sveicci vuoitij ive 2024 Euroviisuid, tot peesâi automaatlávt ive 2025 finalân nuuvtko Euroviisui vittâ stuárráámuu ruttâdemeennâm ađai Espanja, Italia, Ranska, Ovtâstum kunâgâskodde já Saksa. Finalân uásálistii tai lasseen enâmeh, moh lijjii love pyeremuu juávhust vuossâmuu semifinalist já nube semifinalist.
Jyehi uásálistee staatâst lâi jieijâs rääđi, mii meridij mon staatân rääđi juáhá jieškođe-uv čyegismere (1, 2, 3, 4, 5, 6, 7, 8, 10 já 12). Jyehi rääđist lâi jieijâs tieđetteijee, kii almottij čuággáid.