L’Arrondiment dels Sarrasins es una division administrativa e una anciana division electorala francesa situada dins la region d'Occitània, ancianament de Miègjorn-Pirenèus e lo departament de Tarn e Garona. Lo caplòc es la vila lengadociana dels Sarrasins. L'arrondiment s'espandís en Lengadòc, a l'entorn dels Sarrasins, en Carcin (a l'entorn de Moissac), en Agenés e en Gasconha (Lomanha). La lenga autoctòna es l'occitan, lengadocian o gascon.
Se creèt en 1800 dins lo departament de Nauta Garona.
En 1808, l’arrondiment servís, amb tròces d’autres departaments, a crear lo Tarn e Garona.
Annexèt en 1926 l’ancian arrondiment de Moissac, mès perdèt los cantons de Verdun de Garona [1], de Grisòlas [2] e de Montuèg [3], transferits a l'arrondiment de Montalban. En 1810, l'arrondiment aviá ja perdut lo canton de Vilabrumièr [4], passat a Montalban. Lo resultat d'aquels transferiments es que l'arrondiment dels Sarrasins, abans 1926 pus poblat que lo de Moissac, es format màgerment del territòri de l'ancian arrondiment de Moissac (7 ancians cantons sus 12, 51 comunas sus 103, mès son pus grandas e, en 2012, pus pobladas dins l'ensemble).
L'arrondiment a gardat las 103 comunas d'abans 2015, sense cap de fusion desempuèi (en 2019).