Lütt Meckels (hoochdüütsch Klein Meckelsen) is en Oord un Gemeen in de Samtgemeen Zittens in’n Landkreis Rodenborg (Wümm) mit 921 Inwahners (Stand 31. Dezember 2023). Neven Lütt Meckels sülvst höört ok de Oordsdelen Maschhorst un Langenfelden to de Gemeen.
Geologie
En Översicht över de Geologie un Entstahn vun dat Rebeet vun’n helen Landkreis is in den Artikel Landkreis Rodenborg (Wümm) beschreven un kann dor naleest waarn.
Historie
Lütt Meckels is 1388 to’n eersten mol as Lütken Meckelstede in en Oorkunn nöömt warrn, üm 1500 warrt vun 14 Hüüs un üm un bi 70 Inwahners bericht. Twüschen 1806 un 1814 is dat Rebeet üm Lütt Meckels vun de Franzosen besett. As Napoleon en Straat vun Bremen na Hamborg boen lett, warrt ok Lütt Meckelser to Hand- un Spanndeensten rantogen. Later, 1850, warrt de eerste plaasterte Straat in Lütt Meckels boot. To’n End vun’n Tweeten Weltkrieg – rund dree Weken för’t Kriegsend – is Lütt Meckels vun de Briten mit ungefäähr 100 Panzers besett worrn.
De Oord Lütt Meckels is al tweemol bi den Wettstriet „Unser Dorf soll schöner werden“ Bundssieger worrn. Dat weer in de Johren 1971 un 2001.
Religion
Lütt Meckels is evangeelsch-luthersch präägt un höört to dat Kaspel von de Dionysius-Kark in Zittens.
För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.
Politik
Gemeenraat
De Gemeenraat vun Lütt Meckels sett sik mit de Börgermeesterin ut 9 Lüüd tohopen. De letzte Kommunalwahl weer 2016:
Börgermeesters
| Tied |
Börgermeester |
Partei
|
| 1972-1981 |
Hinrich Fahjen |
|
| 1981-1991 |
Johann Bahlburg |
|
| 1991-2011 |
Ilse Ropers |
CDU
|
| 2011- |
Heiko Schmeichel |
Börgerlist
|
Wapen
Dat Wapen vun Lütt Meckels wiest en spleten Schild. De linke Siet is dör en sülvern, bülgigen Balken ’n beten schraag in root un gröön ünnerdeelt. Dat rode Feld baven nimmt twee Drüttel in un wiest ein golden Möhlenrad, dat in den sülvern Bülgenbalken induukt. De rechte Siet is sülvern un wiest op’n roden Toornkopp de gröne Spitz vun en Karktoorn mit en golden Wederflögel.
Verkehr
Lütt Meckels liggt an de K 123 de Ippens mit Groot Meckels verbinnt, un dor an de L 142 anslutt, de na Zittens föhrt. In Zittens gifft dat mit de Opfohrt 47 Zittens en Ansluss an de A 1 (Afsnidd Hamborg–Bremen).
Kultur un Inrichten
Bildung
Lütt Meckels hett en Grundschool, de 1966 as Middelpunktschool inweiht weern, nadem in de Dörpsscholen in Groot un Lütt Meckels, Vierden un Ippens dicht maakt worrn sünd. As veer Johr later ok de School in Woonst slaten worrn is, weer denn Lütt Meckels to en Grundschool ümfunktschoneert.
1992 kreeg de School en nee’t Dack un is utwiet un moderniseert worrn. Ok an den Schoolhof is siet dem eeniges Maakt worrn. De School richt in’t Johr eenige Fiern ut un hett ok en Reeg an Arbeitsgemeenschoppen un Projekten för de Schölers praat, as t. B. en Theater-AG oder ok en plattdüütschen Leeswettstriet, de all twee Johren stattfinnt.
