Hellweeg is en Oort un Gemeen in de Samtgemeen Söttmer in’n Landkreis Rodenborg (Wümm) mit 1138 Inwahners (Stand 31. Dezember 2023). De Gemeen sett sik ut den Karnoort Hellweeg un de dree Oortsdelen Auf der Meente, Bredenfellermoor un Stell tohopen.
Geografie
De Gemeen Hellweeg liggt an’n westlichen Rand vun’n Landkreis un slutt na Westen hen an den Flecken Otterbarg un in’n Süden an de Eenheitsgemeen Langwedel an, de beid to’n Landkreis Veern höört. In’n Oosten vun Hellweeg liggt de Gemeen Ahusen un in’n Noorden grenzt de Gemeen Söttmer an.
De Landschop sett sik tohopen ut Woolden mit Barken-, Böken- un Dannenbööm, lütte un grote Heidflachen un eenige Moorrebeden.
Geologie
En Översicht över de Geologie un Entstahn vun dat Rebeet vun’n helen Landkreis is in den Artikel Landkreis Rodenborg (Wümm) beschreven un kann dor naleest waarn.
Historie
In en Oorkunn is Hellweeg 1275 dat eerste mol nöömt worrn. Ünner den Naam „Hellewede“ weer dorin vun den Bischop Konrad vun Veern an de Afgaven vun de Börgers dacht. Woneem de Naam herkummt, is nich nipp un nau kloor: Dat mag wesen, dat de vun de hellen Sandweeg afleidt is oder villicht doch ok vun de Landsknechten, de hier jemehr Heerweeg (in’t Middelöller as Hellweg betekent) folgt sünd. Siedlers geev dat aver seker al veel fröher in at Rebeet. Dorvun tüügt nich blots de tallrieken Bultengräver, man ok vele Funnen as Toonschören oder Steenwarktüüch ut de Tiet twüschen 2000 bit 1600 v. Chr.
Anfangs weer Hellweeg en ool Buerndörp, dat twüschen Feller, Woolden un Wischen legen hett mit dat Wümmsietland in’n Noorden. De eerste Brüch, över de een ok föhren künn, weer 1911 över de Wümm boet. Dorför güng de Verkehr dör de Wümm. Blangen den Dörtigjohrigen Krieg, över denn nich veel överlevert is, weer de Tweete Weltkrieg ünner de düstersten Tieten för de Gemeen. In de Tiet sünd in dat Rebeet blangen engelsche un düütsche Soldaten ok mehrere Inwahners vun Hellweeg üm’t Leven kamen un vele vun de Hüüs weern tonichten maakt.
Politik
Gemeenraat
De Gemeenraat vun Hellweeg besteiht ut ölven Lüüd, de sik siet de letzten Kommunalwahl vun’n September 2016 as folgt tohopensett:
| Partei
|
2016
|
2011
|
2006
|
| CDU
|
4
|
4
|
5
|
| SPD
|
7
|
7
|
6
|
Börgermeester
De Börgermeester vun Hellweeg is Wolfgang Harling vun de SPD. He warrt vertreden vun sien eersten Viez Heiner Lange vun de CDU un sien tweeten Viez Heiko Eisermann vun de SPD.
Wapen
Dat Wapen hett en roden Grund, wat de Klöör för Neddersassen is un för de Heidflachen steiht. Ünnerdeelt warrt dat Wapen vun en sülvernen Schraagbalken op den wedder en blauen Bülgenbalken dorstellt is. De Bülgenbalken is en Teken för de Wümm, wiel de sülverne Balken för de hellen Weeg (Sandweeg) oder Heerweeg vun de Gemeen steiht, vun de ok de Naam vun de Gemeen afleidt is. Vörn baven is en sülvern Spitznagelkrüüz to sehn, dat op de Tohöörigkeit to dat Bisdom Veern hendüüt. Achtern ünnen is toletzt en sülverne Ekel afbillt, as’n Teken för de Ekenwoolden in de Gemeen.
Kultur
Hellweeg heet ’n lütte Utwahl an Verenen för’t Gestalten vun de Freetiet. So hett de Gemeen blangen de Freewillige Füerwehr en Schüttenvereen un en Angelsportvereen. De Bredensport is in’n TuS Hellweeg organiseert. Butendem gifft dat en Reservistenkameraadschop un en Oortsgrupp vun de VdK.
Verkehr
De Gemeen liggt nich wiet weg vun de BAB 1. De neegste Anslussteed is de Opfohrt 51 Posthusen, man ok na de Opfohrt 50 Stuckenbossel is gau hentokamen. Blangen disse Hööftverkehrsader gifft dat blots noch twee Kreisstraten, de dör de Gemeen föhrt. Dat een is de K 205, de vun Oosten her vun Ahusen kummt, in Hellweeg denn na Noorden wieterlöpt un den Oort mit Söttmer verbinnt. Dor münnt se in de B 75. De annere is de K 234, de in Hellweeg aftwiegt un wieter na Westen föhrt, woneem se in’n Noorden vun Posthusen in de L 155 inmünnt.
Weblenken
