Groot Meckels (hoochdüütsch Groß Meckelsen) is en Oort un Gemeen in’n Westen vun de Samtgemeen Zittens in’n Landkreis Rodenborg (Wümm) mit 515 Inwahners (Stand 31. Dezember 2023). To Groot Meckels höört ok de Oortdeel Kohmöhlen.
Geographie
De Gemeen Groot Meckels liggt an westlichen Rand vun de Samtgemeen un warrt na Oosten hen vun de Gemeen Zittens un in’n Noorden vun de Gemeen Lütt Meckels begrenzt. Man, Groot Meckels hett siet meist 200 Johren al weniger Inwahners as Lütt Meckels. De lüttere Oortsdeel Kohmöhlen liggt dorbi twüschen de beiden Meckelser Dörper. Kohmöhlen weer fröher en Riddergood mit veel Lännereen dorbi. Hier weer de Familie „Schulte von der Lüh“ ansässig. De annern Sieten vun de Gemeen sluut an de Samtgemeen Zeven, mit de Gemenen Heeßel in’n Noordwesten un Elsdörp in’n Süüdwesten an.
Vun de Landschap her tellt de Gemeen Groot Meckels to de Harsfelder Geest, de prägt is vun de sandigen un lehmigen Aflagern vun de letzten Iestiet (Schuuvmergel). In’n Westen raakt de Oost an dat Rebeet vun de Gemeen. Dorin münnt ok de Kohbeek, de vun Kohmöhlen kummt un ut den Möhlendiek spiest warrt. De Möhlendiek is ruchweg 2,5 ha groot. An sien Över liggt ok de ehmolige Ridderseet.
Geologie
En Översicht över de Geologie un Entstahn vun dat Rebeet vun’n helen Landkreis is in den Artikel Landkreis Rodenborg (Wümm) beschreven un kann dor naleest waarn.
Historie
In de Feldmark vun Groot Meckels warrt siet 1986 Utgraven dörföhrt vun den Kreisarchäologen vun’n Landkreis Rodenborg (Wümm). De Grund weer, dat dor op en Acker antike Toonschören funnen worrn sünd. Bi de Utgraven is en kompletten Siedelsteed ut de Kaiser- un Völkerwannerntiet (Gruvenhüüs) togang kamen, de över mehrere Johrhunnerten bewahnt wesen is. Dorna to sluten müss Groot Meckels al 2000 Johren oolt wesen.
Religion
Groot Meckels is evangeelsch-luthersch präägt un höört to dat Kaspel von de Dionysius-Kark in Zittens.
För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.
Politik
Gemeenraat
De Gemeenraat vun Groot Meckels sett sik mit den Börgermeesterin ut 6 Lüüd tohopen. De letzte Kommunalwahl weer in’n September 2011
| Partei
|
2016
|
2011
|
2006
|
2001
|
| CDU
|
5
|
6
|
6
|
8
|
| SPD
|
1
|
1
|
1
|
1
|
Wapen
Dat Wapen vun Groot Meckels is gröön un sülver un wiest en sietere Delen op. Baven is en golden Handwaag dorstellt, ünnern en Bülgenstörtspoor.
Verkehr
Midden dör de Gemeen föhrt de L 142, de Zittens mit Zeven verbinnen deit un de Hööftverbinnen twüschen disse beiden Öörd dorstellt. Vun Zittens ut kummt man över de Opfohrt 47 Zittens op de A 1 (Afsnidd Hamborg–Bremen), de dör den süüdlichen Deel vun de Feldmark löppt. Över de K 123 kummt man vun Groot na Lütt Meckels un wieter na Ippens in de Gemeen Vierden. in Hööch vun den Oortsdeel Kohmöhlen geiht noch de K 126 af, de na Volkens föhrt.
Kultur
Vör allen de Oortsdeel Kohmöhlen liggt sünners idyllsch an’n Möhlendiek mit veel Wooldrebeet ümto. Dor kann man fein Wannern un to’n End denn Kaffee Drinken in de Gaststeed in dat olle Goodshuus. De Gegend warrt ok veel vun Lüüd ut Bremen oder Hamborg för Utfohrten an’n Wekenend besocht.
De aktive Dörpsleven warrt to’n Deel in Verenen organiseert. In Groot Meckels gifft dat de Freewillige Füerwehr, en Sportvereen un de Dörpsjöögd, de to’n Bispeel to’n Harvst en egen Oornfest utrichten doot.
Weertschap
Groot Meckels is en ländlich Dörp, wat ünnerstreken warrt vun de 15 Buereen, de all as Vullbedrieven föhrt warrt. Gewarfsbedrieven is in Groot Meckels nich veel to finnen, man vun wegen de Laag as Teel för Utfohrten, gifft dat in Groot Meckels dree Gaststeden un een Hotel.
Weblenken
