Glenesk

Glenesk
De Molteree vun de ehmolige Brennere Glenesk (Foto: Stanley Howe)
Land	Schottland
Region	Highlands
Tyyp	Malt, Grain
Status	stillleggt (1985)
Besitter
Grünnt	1897
Grünner	James Isles
Washstill(s)	2
Spiritstill(s)	2

Glenesk (fröher ok bekannt as Highland Esk Distillery oder North Esk Distillery) weer en Whisky-Brenneree in de Neeg vun de Stadt Hillside, Angus, Schottland.

Historie

De Destille is 1897 vun den Wienhännler James Isle ut Dundee ünner den Naam Highland Esk Distillery ut en Flassmöhl grünnt worrn. Se hett eerst Single Malt herstellt. 1899 is de Brenneree vun J.F. Caille övernahmen worrn, de ehr in North Esk Distillery ümnöömt hett. Wiel den Eersten Weltkrieg weer de Brenneree dicht, gliek dorna aver ok wedder apen maakt. 1938 is Glenesk an de Associated Scottish Distilleries gahn, de de Produkschoon op Grain Whisky ümstellt hebbt. 1954 is se denn an de Distiller Company Ltd. (DCL) verköfft worrn un keem so an de Scottish Malt Distillers (SMD), de wedder op Malt Whisky ümstellt hebbt. Ehrn Naam Glenesk hett se 1980 kregen, man 1985 weer de Destille denn stillleggt.

De Lizenz to’n Brennen hett de Brenneree 1992 verloren, 1996 sünd de Hüüs deelwies afreten worrn, de Rest weer an Paul’s Malt verköfft. De ehmolige Brennree is denn to en grote Molteree utboet worrn, de bit 2010 to Greencore Malt höört hett, en Dochter vun de irischen Levensmiddelfirma Greencore^[1]^[2]. De Firma is aver 2010 an de belgische Boortmalt-Grupp verköfft worrn, wat en Dochter vun de franzööschen Axéréal is^[3].

Produkschoon

In de ehmolige Brenneree geev dat veer Brennblasen – Twee wash stills un twee spirit stills. De Single-Malt-Affüllen gifft dat deelwies ünner den Naam Glenesk, vör allen aver as Hillside. Vundaag is dorvun nich mehr veel op’n Markt to finnen, mitünner gifft dat noch Affüllen in’n Rahmen vun Rare Malt Series. De Whisky is aver ok för de Produkschoon vun Blend-Whiskys bruukt worrn. To’n Bispeel weer he en bedüden Bestanddeel vun den Vat 69^[2].