Радебојл (германски: Radebeul) — град во долината на реката Елба, во округот Мајсен, во сојузната покраина Саксонија, Германија, во близина на Дрезден. Добро е познат по неговото лозарство, музејот посветен на писателот Карл Мај и железничката линија на тесен колосек, која го поврзува Радебојл со замокот Морицбург и градот Радебург. Областа Мајсен, каде се наоѓа Радебојл, е една од најсеверните области, каде се одгледува винова лоза.
Понекогаш е нарекуван „Саксонскиот Убавец“ поради неговата убава околина и свежа клима.
Историја
Селото Радебојл било првпат споменато во 1349. Во 1905 кон него било припоено селото Зерковиц. На 1 април 1934, Радебојл станал град. Во меѓувреме, кон соседното село Кеченброда било додадено селото Линденау во 1920 и Наундорф, Цичевиц и Нидерлесниц во 1924, кога бил прогласен за град. Во 1934, Вансдорф и Оберлесниц му се приклучиле на Радебојл, а на 1 јануари 1935, градовите Кеченброда и Радебојл биле обединети под името Радебојл („Kötzschenbroda“ има словенско потекло, ова име било сметано за премногу „негерманско“ во тоа време). Во 1947 Радебојл станал дел од округот Дрезден. Во 1995 го добил статусот на главен град во руралниот округ (große Kreisstadt); кога руралниот округ на Дрезден (Dresden-Land) бил распуштен, Радебојл станал дел од округот Мајсен.
Сообраќај
До градот може да се дојде со трамвајската линија 4 на Дрезденското сообраќајно претпријатие или со линијата С1 на дрезденската С-Железница, која опслужува четири станици во Радебојл. Регионалните возови 18 и 50 на Германските железници, исто така, застануваат на источната железничка станица Радебојл. Оваа станица е терминал и на железницата на тесен колосек Радебојл-Радебург, која е близу музејот на Карл Мај.
Главни знаменитости
Древна винска преса во замокот Хофлесниц во Радебојл
Радебојл бил познат по неговите лозја од 1324. Се наоѓа на саксонската винска патека.
Театар
Покраинска бина Саксонија (Landesbühnen Sachsen)
Музеи
Музеј Карл Мај
Градска галерија Радебојл (Stadtgalerie Radebeul)
Hoflössnitz Stiftung Weingutmuseum
Volkssternwarte „Adolph Diesterweg“
"Zeitreise" Interessantes zur DDR-Zeit
Редовни настани
годишниот Karl-May-Fest на викендот Спасовден
годишниот Radebeuler Grafikmarkt, кој се одржува секоја есен
годишниот Spitzhaustreppenlauf - трка по 397-те скали во Spitzhaus
годишниот Двоен маратон Монт Еверест - вклучува искачување и симнување по скалите стопати - вкупно 39.700 чекори: двојно повеќе од растонието на маратон и висина на Монт Еверест (може да се настапи поединечно или во тимови од 3 или 10)
