O Partido Galego Social Demócrata (PGSD) foi un partido nacionalista galego.
Fundouse co nome de Unión Social-Demócrata Galega en marzo de 1974, dirixido por Xosé Luís Fontenla Rodrigues e Alfonso Zulueta de Haz. Era partidario da autodeterminación co fin de integrarse posteriormente nun Estado Federal. A súa ideoloxía defendía un socialismo democrático, humanista, personalista e comunitario [1]
Tan só tivo algunha implantación nas cidades. Formou parte do Consello de Forzas Políticas Galegas (1976), abandonándoo xunto coa UPG en 1977 por discrepancias sobre o diálogo coas forzas estatais. Con todo, o PGSD abandonou logo da elección de Zulueta de Haz[2] en marzo de 1977 como principal dirixente os postulados máis esquerdistas, aceptando a autonomía. Formaban tamén parte da dirección Avelino Pousa Antelo, Xosé Manteiga Pedrares, Quico Domínguez e Ramón Barral. Achegouse ao Partido Popular Galego, de ideoloxía demócrata-cristiá, co que participou nas eleccións xerais de 1977. Os malos resultados 23 014 votos (2,04 %) propiciaron a formación dun novo partido, formado polo PGSD e o PPG, co nome de Partido Galeguista e a desaparición do PGSD.