A Federación Internacional da Medalla de Arte (en francés: Fédération Internationale de la Médaille d'Arte; en inglés: International Art Medal Federation), coñecida tamén polo acrónimo FIDEM, é unha asociación profesional de ámbito internacional dedicada á práctica e a promoción da medallística artística.[1]
A entidade está presidida polo numismático británico Philip Attwood.[2]
Historia
A FIDEM fundouse en París en 1937 como un instrumento para a promoción e a difusión da arte de gravar medallas a nivel internacional, de maneira que se garanta o seu recoñecemento e a súa consideración entre as demais modalidades artísticas, principalmente mediante publicacións e a través da organización de acontecementos internacionais.[3]
Os seus membros son desde artistas medallistas ata institucións como museos, casas de moeda, fundacións, bibliotecas, asociacións, empresas do sector e universidades de todo o mundo.[4]
Funcionamento
A Federación Internacional da Medalla de Arte opera en arredor de 40 países, nos que conta coa figura dun delegado e un vicedelegado que manteñen contactos regulares cos artistas afiliados e con outras persoas e entidades relacionadas dun xeito ou doutro coa medallística.
Entre os principais eventos, a FIDEM organiza un congreso e unha exposición internacionais de periodicidade bianual sobre a arte da medalla, no transcurso dos cales se producen contactos e intercambios de ideas entre os artistas desta especialidade. O XXXV congreso, correspondente a 2018, tivo lugar en Otava, Canadá.[5][6][7]
Con ocasión de cada congreso-exposición, a entidade publica desde 1938 a revista Médailles, de difusión gratuíta entre os seus membros, que, entre outra información, agrupa artigos acerca dos temas tratados no congreso e sobre as medallas presentadas na exposición.[8][9]
Premios da FIDEM
Gran Premio FIDEM
No congreso que tivo lugar en Londres en 1992 instituíuse o Gran Premio da FIDEM, que se lle concede a unha das medallas presentadas en cada unha das exposicións internacionais bianuais, logo do seu exame por parte dun xurado escollido polo Comité Executivo e Consultivo da entidade, que atende a uns criterios prefixados por esta. A identidade dos gañadores coñécese en cada caso durante a cerimonia de clausura de cada congreso, momento no que se fai a entrega do galardón.[10]
Estes son os gañadores do premio:[11]
Premio FIDEM AT 70
En 2007 instituíuse este premio creado para conmemorar o 70 aniversario da entidade. Concédese a unha ou varias persoas que destaquen polo seu apoio ao mundo da medalla.
Desde a súa creación, máis dunha trintena de artistas foron galardoados con este premio. Na súa edición de 2018 resultaron galardoados os canadenses Lynden Beesley, Susan Taylor, Lorraine Wright, Michael Groves e David Dunlop.[13]
Notas
Véxase tamén
Outros artigos
Ligazóns externas
Asociacións relacionadas coa numismática |
|---|
| Ámbito internacional | |
|---|
| Europa | |
|---|
| América | |
|---|
| Asia, África e Oceanía | |
|---|
| Véxase tamén | |
|---|
