Sociedad Deportiva Samertolameu, Meira izenaz ezagunagoa, Galiziako Pontevedrako probintzian dagoen Moaña udalerriko arraun elkarte bat da, zehazki esateko Meira parrokiako arraun elkartea. Udalerri bereko Tirán parrokiako Sociedad Deportiva Tiranekin batera Pontevedrako garrantzitsuena.
Elastiko zuri eta berdea du, eta A Terca trainerua berdea da. 1990. hamarkadan Meiramar traineru zuria izan zuen.
Kluba sortu aurretik 1960. hamarkadaren hasieran Meirako arraunlariek emaitza on batzuk izan zituzten. Espainiako txapeldun izan ziren 1960an (Educación y Descanso de Moaña) "Virgen de la Peregrina" trainerua Jaime Rúa moañatarrak gidatuta. Urte hartan Tiránek ez zuen parte hartu txapelketan[1]. Hauek Generalísimoaren Koparako baliagarriak ere baziren. 1963an berriz nagusitu ziren Generalísimoaren Kopan Jaime Rúaren agindupeko meiratarrak[2] eta 1967 arte estropadako podiumean izan ziren urtero.
Samertolameu izeneko elkarteak 1979. urteko uztailaren 4an egin zuen debuta[3]. Samertolameu izeneko traineru zahar bat hartu eta berehala bihurtu zen Galiziako kluben artean nagusi, 1979 eta 1986 urteen artean Pontevedrako txapelketa sei aldiz irabazita eta 1987.an Galiziako txapelketa bateratua sortu zenean 1994 arteko txapelketa guztiak irabaziz 1989koa ezik. 2003 eta 2007 urteetan ere Galiziako txapeldun izan zen.
1993. urtea ikaragarria izan zen Meiramar traineruko arraunlarientzat. Galizian jokaturiko estropada guztiak irabazi zituen, guztira 19 bandera eta hainbat titulu jasoz[4]. 1994. urtean Jose Manuel Francisco entrenatzaileak hartu zuen ardura eta emaitza bikainak izan zituen Galiziako nagusitasunaz gain Espainiako Traineruen Txapelketan bigarren postua eta Kontxako Banderan hirugarrena lortu zituelarik[5]. Urte hauetan goia zuen baina hurrengo urteetan Tirangoek aurrea hartu zioten, Meiraren indarra gutxituz joan zen heinean.
2003. urtean TKE liga sortu zenean Meirak uko egin zion parte hartzeari eta Ipar-mendebaldeko Traineruen Liga txapelketaren sorrera bultzatu zuen. Lehenengo lau denboraldietan txapelduna izan zen eta 2008. urtean TKE ligarako igoera fasea jokatzea erabaki zuen (honek galiziarren arteko liga galtzea ekarriko bazion ere)[6]. Azkenik lortu zuen mailaz igotzea baina urtebetez bakarrik egon zen TKE ligan.[7]
2013an ordean taldea nabarmen indartu zuen Galiziako Liga irabazi eta berriz ere TKE Ligara itzultzeko asmo garbiarekin. Lehenengo helburua nahiko erraz bete zuen baina azken asteetan ez du esperotako maila eman eta play-offetan laugarren eginez ez zuen TKE ligara igotzerik izan. 2014an Galiziako Liga seigarren aldiz irabazi zuen eta play-offetan erraz gailenduz TKE Ligara itzuli zen. Hasiera hasieratik larri ibili zen, arraunlariak lortzeko arazoak izan baitzituen. Emaitza txarren ondorioz entrenatzailea ere uztailean bertan aldatu zuen[8] baina ez zen gorakadarik ikusi eta Liga azken postuan amaiturik maila galdu zuen.[9]
2017an eta 2018an Galiziako Traineruen Liga irabazi zuen berriz eta TKE Ligarako play-offak jokatu zituen, baina ez zuen igotzerik lortu. 2018an 44 ehunenekorengatik gelditu zen igoera lortu gabe[10]. 2019an apalago ibili ondoren 2020an Galiziako ligan bigarren postua eskuratu zuen irabazle izan zen Tirán auzokoarekin puntutan eta estropada kopurutan berdinduta. Ligako azken estropada irabazi ez izanak utzi zuen saririk gabe. Hurrengo urtean bederatzigarren aldiz irabazi zuen Galiziako Liga eta play-offetan TKE Ligara igo zen hirugarren aldiz.[11]
2023an berriz ere azkena izan zen TKE Ligan eta maila galdu zuen[12]. 2024an ziklo berri bati eman zioten hasiera eta maila apalean ibili zen, seigarren egin baitzuen ligan, inoizko emaitzarik eskasena.
2021. urtean bigarren Samertolameuk trainerua osatu zuen eta Galiziako B Ligan hartu zuen parte. Bosgarren egin zuen 11 traineruen artean. Hurrengo urtean bigarren postuan gelditu zen. Talde nagusia TKE Ligara igo zenez B taldea A Ligara igo zen play-offak irabazi ostean[13]. 2023an Ligan azkena gelditu eta maila galdu zuen.
2012 artean beste klub batzuekin batera S.D. Rias Baixas taldea osatu zuen.
Hauek dira lorturiko emaitza nagusiak:
2014an trainerua atera zuen Chapelarekin batera, baina Samertolameuren izenean eta Euskotren Ligan sartu zen. Laugarren egin zuen[14]. Galiziako Txapelketa irabazi zuen, baina bi traineru besterik aurkeztu ez zirenez Trofeo FEGAR izena izan zuen. Teresa Herrera Bandera ere irabazi zuen, emakumezkoen lehenengo ekitaldia, honetan ere bi traineru baino ez ziren lehiatu.
2020an lortu zuen berriz trainerua osatzea, baina arraunlari batek COVID-19 gaitzean positibo eman ondoren sei estropadatatik azkenengo hirurak ezin izan zituen jokatu.