L'Aeropuertu Internacional Bandaranaike (tamién conocíu como Aeropuertu Internacional Katunayake) (IATA: CMB, OACI: VCBI) ye unu de los trés aeropuertos internacionales de Sri Lanka y sirve al so capital, Colombu. Los otros dos son l'Aeropuertu Ratmalana, tamién en Colombo, y l'Aeropuertu Internacional Mattala Rajapaksa, na ciudá sureña de Hambantota.
L'Aeropuertu Internacional Bandaranaike ta alcontráu en Katunayake, 35 km al norte de Colombo. Ta xestionáu por Airport and Aviation Services (Sri Lanka) Ltd. Ye la base d'operaciones de SriLankan Airlines, l'aereollinia nacional de Sri Lanka.
L'aeropuertu empezó como una base de la Real Fuercia Aérea mientres la Segunda Guerra Mundial, la RAF Negombo. En 1957, cuando Solomon Bandaranaike espulsó toles bases militares britániques de Sri Lanka (Ceilán), la base foi xestionada pola Real fuercia aérea de Ceilán (RCyAF) y renombrada como Katunayake. Parte del aeropuertu sigue inda en manes de la fuercia aérea.
En 1964, Anil Moonesinghe, el ministru de comunicaciones, empezó la construcción d'un nuevu aeropuertu internacional pa reemplazar el de Ratmalana, con ayuda canadiense. L'aeropuertu quedó concluyíu en 1967 y Air Ceylon, l'aereollinia de bandera, empezó los sos vuelos internacionales dende él utilizando un Hawker Siddeley Trident y arrendó un British Aircraft Corporation (BAC) VC-10 de British Overseas Airways Corporation (BOAC). L'aeropuertu foi tamién mientres un curtiu periodu una base d'operaciones de Trans World Airlines (TWA) .
En 1970 foi bautizáu como Aeropuertu Internacional Bandaranaike (BIA), n'honor al antiguu primer ministru de Sri Lanka. En 1977 foi renombráu como Aeropuertu Internacional Katunayake, pero en 1995 tornó al so nome d'Aeropuertu Internacional Bandaranaike.
Los proyeutos d'ampliación fuéronse aplicando al aeropuertu internacional Bandaranayake. Un cai con ocho fingers foi abiertu en payares de 2005, el primeru del so tipu en Sri Lanka.
El 7 de mayu de 2007 el gobiernu de Sri Lanka decidió mover la mayoría d'aviones militares del espaciu aereu del aeropuertu a la base de Hingurakgoda, allanando el camín a un mayor númberu d'operaciones civiles.
L'aeropuertu ta reasfaltando la pista d'aterrizaxe.
Los proyeutos pal futuru inclúin una segunda pista p'atender al Airbus A380, el mayor avión comercial del mundu, ocho puertes d'embarque más, una terminal doméstica, un aparcamientu de cinco piso, y un hotel de cinco estrelles xunto al aeropuertu. Tamién se crearon nueves víes d'aproximamientu al aeropuertu.[1]
En 1956 cola salida de la RAF de la base RAF Negombo, la Real Fuercia Aérea de Ceilán tomó'l control d'esta y la renombró como base Katunayake. Cola construcción del Aeropuertu Internacional Bandaranaike, ocupóse la mayoría de la base aérea. Sicasí la fuercia aérea de Sri Lanka permaneció nél y amplió la so base aérea na redoma del aeropuertu internacional. Nesti momentu ye la mayor base de la SLAF del país y ye base de dellos escuadrones aéreos lo mesmo que de unidaes de tierra. L'hospital de la fuercia aérea tamién ta asitiáu en SLAF Katunayake.
En marzu de 2001, nel 50 aniversariu de la base de la fuercia aérea de Sri Lanka foi presentada colos colores presidenciales.[2]