Malé[1] (dhivehi: މާލެ), ye la capital de la República de les Maldives. La ciudá alcuéntrase na islla de Malé, nel cantu sur del atolón de Malé nel atolón Kaafu. Ye sede del gobiernu y el centru de negocios, comercial, empresarial, sanitariu y educativu. Tien una población d'aproximao 105.000 persones, alredor d'un terciu de la población del país.[2]
La islla ta totalmente urbanizada, la ciudá tomó esencialmente tol terrén. Ta estremada en cuatro árees; Henveiru, Galolhu, Maafannu y Machangolhi, otres 3 árees de la ciudá atópense fora de la islla de Malé, Vilimalé na islla de Villingili, Hulhumalé na islla artificial del mesmu nome y Hulhule otra islla au s'atopa l'aeropuertu.
Historia
En 1953 intentó establecese una república pero pocos meses dempués reimpúsose'l sultanatu, siendo Malé la capital del mesmu, en 1968 foi reinstaurada la república, siguiendo como la capital.
Imaxe del tsunami qu'afaró amplies rexones del sureste asiáticu y llegó hasta Malé.
El 29 de setiembre de 2007 españó una bomba cerca d'una mezquita, mancando a 12 turistes. Considérase la primer bomba qu'españó na ciudá.[3]
Etimoloxía
El nome Malé ta tomáu de la pallabra Mahaalay, que provién del idioma sánscritu. El nome deriva de maha, que significa "grande" o "gran", y aalay, que significa "casa". De normal la pallabra Mahaalay úsase pa denomar el palaciu d'un rei o la capital (islla del rei) en sánscritu, p. ex., Mahaalay del Rei Asok. Sicasí, los cuentos tradicionales suxeren un orixe distintu del nome.
El conxuntu enteru d'islles, Les Maldives, recibe'l nome del sánscritu. Mal (milenta) y dives (islles). Milenta islles, una y bones La República de les Maldives compónse de 1196 islles.
Servicios
Nesta ciudá pueden atopase tolos servicios básicos, amás cunta con bancos, numberosos caxeros automáticos y la mayoría de les empreses de courier internacionales.[4] Tien dellos centros de salú, como l'Hospital Indira Gandhi Memorial (IGMH), que ye'l mayor del país, y na salú privada l'Hospital ADK ye'l más importante.[2] En Malé tamién s'atopa la mezquita más grande del país, Friday Mosque.[5] Esiste tamién un serviciu de taxis, que'l so valor máximu ta reguláu pol gobiernu.[2]
