PROFILBARU.COM

Coordenada
	páxina de dixebra de Wikimedia

Sistema de coordenaes Cartesianes nel planu

Una coordenada ye un valor que permite definir la posición de cualquier puntu d'un espaciu xeométricu respectu d'otru puntu llamáu orixe.

Hai dellos sistemes de coordenaes estremaos:

Sistema de coordenaes cartesianes

Les coordenaes cartesianes defínense por dos exes cuando los puntos tán nun planu y por trés nel espaciu. Son exes perpendiculares ente ellos que se corten nel orixe. Les coordenaes d'un puntu cualquiera vienen daes peles distancies ente l'orixe y les proyeiciones del puntu sobre caún de los exes.

Sistema de coordenaes polares

Les coordenaes polares defínense por un exe que pasa pel orixe (llamáu exe polar). La primer coordenada ye la distancia ente l'orixe y el puntu consideráu, mentantu que la segunda ye l'ángulu que formen l'exe polar y la recta que pasa per ellos.

Sistema de coordenaes cilíndriques

El sistema de coordenaes cilíndriques ye una xeneralización del sistema de coordenaes polares planu, al que se-y añade un tercer exe de referencia perpendicular a los otros dos. La primer coordenada ye la distancia ente l'orixe y el puntu, la segunda ye l'ángulu que formen l'exe y la recta que pasa pelos dos puntos, mientres que la tercera ye la coordenada que determina l'altor del cilindru.

Sistema de coordenaes esfériques

El sistema de coordenaes esfériques ta formáu por tres exes perpendiculares ente si que se corten nel orixe. La primer coordenada ye la distancia ente l'orixe y el puntu, y les otres dos son los ángulos que fai falta xirar pa llegar a la posición del puntu.