A ermita de Sant Bertolomeu de Gavín ye una ermita aragonesa en o lugar de Gavín, perteneixent a lo termin municipal de Biescas, en a comarca de l'Alto Galligo y provincia de Uesca. Dende lo punto d'a vista d'a suya adscripción administrativa en a Ilesia Catolica, fa parte de l'arcipestrau de Biescas en a diocesi de Chaca y de l'archidiocesi de Pamplona y Tudela.
L'actual ermita posiblement estió la ilesia parroquial de bel lugar hue despoblau y desapareixiu, pero ixo no ye so que una hipotesi no confirmada encara.[1]
Se tracta d'un edificio construyiu en os sieglos X u XI en piedra picada y que bels estudiosos califican como romanico y bels atros como mozarabe. Fa parte d'un grupo d'ilesias conoixiu como "ilesias de Sarrablo" y que poseyen bellas caracteristicas arquitectonicas comuns, amás de situar-se en o Sarrablo: absencia d'elementos decorativos exteriors, poseyer nomás que una sola nau que remata en un abside semicircular, etc. Fácil que se tracte d'a mas antiga d'as ilesias que fan parte d'iste grupo.[2]
D'a ilesia orichinal, que se trobaba en runas, nomás se conserva que la suya torre y parte d'un muro, estando asinas la mayor parte d'a ermita una reconstrucción moderna con partecipación de l'Asociación Amigos de Serrablo,[3][2] feita a partir d'a planta orichinal de l'edificio.
Se tracta d'un edificio formau por nomás que una sola nau con un testero recto y con una torre adosada en a suya frontera sud, accedendo-se a ista torre a traviés d'un acceso abovedau con puerta en arco de ferradura, posible influyencia de l'arte visigodo u de l'arte islamico, que gosaban emplegar iste elemento arquitectonico. Tanimientres, la torre se mantiene con acceso independient d'a nau d'a ermita.[2]
A torre adosada poseye dos trampos clarament diferenciaus, fácil que perteneixents a diferents momentos constructivos. O primero d'istos trampos, dica dos terzs d'a suya altaria total, se troba decorau por rosetas arrodiadas por molduras en formando rectanglos. O trampo superior, clarament diferenciau por a color d'a piedra y por o suyo tamanyo, poseye dos finestras deseparadas por columnas que rematan en tres arcos de ferradura. A parte final d'a torre ye decorada con un arrimadiello de baquetas. Orichinalment fácil que la torre estase cubierta con un tellau en fusta en cuentas de l'actual tellau a cuatre auguas.[2]
Dende l'anyo 2004 ye protechida legalment con a suya declaración como Bien d'Intrés Cultural.[4]