Otal ye emplazau a 1465 metros d'altaria en a comarca natural conoixida como Sobrepuerto, zona altament montanyosa y de difícil acceso en a que toz los lugars se troban a mas de 1000 metros. Dista 38 km de l'Aínsa y 30 km d'o Parque Nacional d'Ordesa y d'as Tres Serols.
O suyo orichen se remonta posiblement a o sieglo XI, encara que a partir d'o sieglo XII sofrió diferents reformas y fue progresivament enamplada.
Fue concebida como un templo de nau rectangular, abside semicircular y dople presbiterio atrofiau, pero as succesivas intervencions mantenioron escasos elementos d'a primitiva fabrica, como l'abside semicircular.
Cualques autors datan a suya construcción entre 1060 y 1070, encara que, como succede en todas las ilesias d'o dito "cerclo larredense", a suya datación y filiación estilistica contina estando polemica.
Templo de planta rectangular con capitero semicircular orientau enta l'este, alzau en sillarello en o capitero y mampostería combinada con toscos y grans sillars en a resta.
Consta de capitero semicircular orientau a l'este, una nau prencipal, mas atra en o costau sud, dos capiellas laterals ubiertas en o costau norte y una torre que se monta sobre una d'istas capiellas.
En primeras yera un edificio d'una sola nau, dople presbiterio atrofiau y abside semicircular. A ixa nau orichinal s'adhibió por lo costau sud unatra nau mas estreita y con capitero dreito, comunicada con a prencipal por dos arcos formers. A lo costau norte s'ubrioron dos capiellas y posteriorment, a sacristía.
En o muro sud s'ubre a puerta en arco de meyo punto, con grans dovelas, que ranca d'un relieu en a base d'as brancas con motivos de sogueau y de mutulos invertius. En a clau presenta l'anagrama IHS.
A torre s'eleva sobre a capiella de l'evanchelio con sillars en a parte inferior y mampostería en a resta, formando un solo cuerpo . L'interior consta de tres pisos plans de fusta. Se cubre con tellau de losa a cuatre auguas en l'exterior y con cupula semiesferica en l'interior.
Detalle de l'abside.
Comentario estilistico
Posiblement fue construyida por un mayestro d'o cerclo larredense, constituyindo un d'os eixemplars caracteristicos de l'arquitectura relichiosa de Sarrablo.
Talment, o suyo mayestro estió lo mesmo que construyió a ilesia parroquial d'Oliván, encara que la d'Otal destaca d'entre todas las ilesias de Sarrablo por a suya proximidat a las formulas constructivas lombardas. Probablement, iste modelo influyise en a construcción de l'abside d'a ilesia de Buil.
Bibliografía
"Arte altoaragonés de los siglos X y XI". Antonio Durán Gudiol. Zaragoza: Ibercaja, 1973.
"El nacimiento del arte románico en Aragón: Arquitectura". Juan Francisco Estebal Lorente et al. Zaragoza: Caja de Ahorros de la Inmaculada, 1982.
"El misterio de las iglesias del Gállego". José Manuel Torralba. Románico. Diciembre 2006 , nº 3, p. 28-35.
