Upper Barton Creek is en Gemeen in’n Distrikt Cayo in Belize.
Geografie
De Oort liggt an’n Noordrand von de Maya-Bargen un dat Westöver von’n Barton Creek, de en poor Kilometer wieder in’n Belize River münnt. Na Oosten to liggt de Tapir Mountain Nature Reserve un na Süden to de Nojkaaxmeen-Eligio-Panti-Natschonaalpark.
De Naveröörd sünd Unitedville un Lower Barton Creek in’n Noordoosten, Springfield in’n Oosten, Seven Miles in’n Süden, San Antonio in’n Süüdwesten, Cristo Rey in’n Westen un Santa Elena, Cool Shade un Georgeville in’n Noordwesten.
Historie
In de Barton-Creek-Höhl in de Neegd sünd Funnen ut de Maya-Tied maakt worrn.
De Oort sülvs is 1969 von kunservative Noah-Hoover-Mennoniten grünnt worrn. Dat weren deelwies Lüüd ut de plautdietschen Mennoniten-Kolonien Spanish Lookout un Shipyard un deelwies Old-Order-Mennoniten un Amische, de Pennsylvania Dutch snackt un ut de USA kemen. Welk von jem harrn vörher al in Pilgrimage Valley siedelt.
Dat weren Gruppen von Mennoniten un Amische, de sik gegen dat Bruken von Motoren un annere Moderniserungen verwehrt hebbt un dorüm en egen Kolonie grünnt hebbt, üm sik stärker gegen de Butenwelt aftoschotten.
1996 is Springfield as Dochterkolonie von Upper Barton Creek ut anleggt worrn, 1997 Pine Hill, 2011 Bird Walk un 2012 Roseville.
Inwahnertall
| Johr |
Inwahners
|
| 2010-00-002010[1] |
380 Lüüd, 54 Huushollen
|
Weertschop un Infrastruktur
Verkehr
De Oort liggt an en Siedenstraat von de Chiquibul Road, de in’n Süden na Augustine föhrt un in’n Noorden över Cool Shade in Georgeville an’n George Price Highway. De Highway löppt in’n Noordoosten över Belmopan na Belize-Stadt un in’n Süüdwesten över San Ignacio/Santa Elena un Benque Viejo del Carmen na de Grenz to Guatemala.
De nächste Flegerplatz is de Matthew Spain Airport bi Central Farm.
Literatur
- Dale J. Nippert: Agricultural Colonization: The Mennonites of Upper Barton Creek, Belize, Memphis 1994
- Helmut Schneider: Tradition und Veränderung in Belize (Mittelamerika): ein soziologischer Vergleich der Gemeinden San Ignacio und Upper Barton Creek, Berlin 1990
- ↑ Zensus 2010 (PDF) von dat Statistical Institute of Belize
