Smafelln

Wapen/Flagg

Koort

Basisdaten

Bundsland: Neddersassen

21439

04185

Koordinaten:53° 17′ N, 10° 0′ O53° 17′ N, 10° 0′ O

Smafelln (hoochdüütsch Schmalenfelde) is en lütten Oort in de Gemeen Marxen (Samtgemeen Hanstää) in’n Landkreis Horborg, Neddersassen.

Geografie

De Oort liggt in’n Noorden von de Lümbörger Heid an dat rechte Över von de Smale Au, nich wied von de Steed, an de de Moorbeek in de Smale Au münnt.

De Naveröörd sünd Marxen in’n Noorden, Braackel in’n Oosten, Quarrendörp in’n Süüdoosten, Hanstää in’n Süden, Diekshuus un Drumbargen in’n Süüdwesten un Asendörp in’n Westen.

Historie

De Naam Smafelln kummt 1295 toeerst vör, as en Lodewicus de Smalenfelde Börger in Lümborg worrn is.^[1] De Oort sülvs dükert eerst 1343 in de Oorkunnen op, as de Bröder von dem Horne dat Klooster Ramßel den eenstelligen Hoff in Smafelln överlaten hebbt.^[1] Dat nächste Maal kummt de Oort denn 1450 as Smalenvelde in dat Winsener Schatzregister vör.^[1]

In dat Lagerbook von dat Amt Winsen von 1681 kummt de Hoff in Smafelln mit Land von 58 Himten Insaat un Wischenland von twölv Foder Hau vör.^[1] De Hoff harr an Veh twee Peer, 29 Kopp Rindveh, söven Swien, 200 Schaap un fiev Immenstöck.^[1]

Dat Wahnhuus von 1809 un de Schüün von 1715 staht vondaag noch.^[1] 1897 is noch en tweet Wahnhuus in Villenform boot worrn.^[1] De Smeed, de üm 1840 rüm anleggt worrn is, is 1921 afreten worrn.^[1] Tosätzlich gifft dat twee Daglöhnerhüüs. Dat een is üm 1850 ut en Schaapstall ümboot worrn, dat annere is Bojohr 1895.^[1]

In Smafelln hett dat von öllers en Watermöhl an de Smale Au geven. De letzte Möhl is 1817 boot worrn, harr twee Etaaschen un is an’n 27. Juni 1959 afbrennt.^[1] To de Tied hett dat jüst Dreiharbeiden to en Film bi de Möhl geven.^[1] De Polizei hett annahmen, dat dat Gebüüd villicht ansteken worrn is, kunn aver nix nawiesen.^[1]

Verwaltungsgeschicht

In de Franzosentied von 1810 bet 1814 hett de Oort to de Mairie Garlstörp in’n Kanton Garlstörp höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Parrns in dat Amt Winsen tohöört. Blots in de Tied von 1852 bet 1859 weer de Oort kort in dat Amt Parrns. Na 1885 weer dat in’n Kreis Winsen un is 1932 Deel von’n Landkreis Horborg worrn.

Bet in de Midd von dat 19. Johrhunnert weer Smafelln egenstännig un is denn Deel von de Gemeen Marxen worrn.

Inwahnertall

Johr	Inwahners
1793-00-001793^[2]	1 Füürsteed
1824-00-001824^[3]	1 Füürsteed
1848-00-001848^[4]	16 Lüüd, 1 Huus
1871-12-011. Dezember 1871^[5]	25 Lüüd, 3 Hüüs

Religion

Smafelln is evangeelsch-luthersch präägt un höört to dat Kaspel von de Jakobi-Kark in Hanstää.

För de Kathoolschen is de St.-Maria-Kark in Äästörp tostännig, de siet 1. November 2014 to de Karkengemeen St. Petrus in Bookholt tohöört.

Weertschop un Infrastruktur

Verkehr

An Smafelln langs löppt de Kreisstraat 10, de in’n Noorden na Marxen, Ramßel un Maschen geiht un in’n Süüdwesten an de Landsstraat 213 ran. Von de K 10 na Noordoosten twiegt de K 59 af, de na Braackel löppt un dor an de L 215 ran geiht.

De L 213 löppt in’n Noorden na Asendörp, Jesborg, Bendsdörp un Hittfeld un in’n Süden na Hanstää un Äästörp.

De nächste Autobahn is de Autobahn 7 (Afsnidd Hamborg–Hannover). De Opfohrt 39 Thieshoop liggt so fiev Kilometer in’n Noordoosten von Smafelln an de L 215.

De nächsten Bahnhööv sünd de Bahnhoff Büsenbeekdaal an de Heidbahn (knapp 13 Kilometer wied weg in’n Süüdwesten), de Bahnhoff Bookholt an de Heidbahn un de Bahnlien Hamborg–Bremen (so bi 13 Kilometer wied weg in’n Noordwesten) un de Bahnhoff Stell an de Bahnlien Hamborg–Hannover (good 14 Kilometer wied weg in’n Noordoosten).

Footnoten

↑ ^a ^b ^c ^d ^e ^f ^g ^h ⁱ ^j ^k ^l Dorferneuerung Marxen. Geschichte und Siedlungsentwicklung.
↑ Christoph B. Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. 1791, Sied 203: https://books.google.de/books?id=jN5QAAAAcAAJ&pg=PA203
↑ C. H. Jansen: Statistisches Handbuch des Königreichs Hannover. 1824, Sied 542: http://books.google.de/books?id=tG0AAAAAcAAJ&pg=PA542
↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 105: http://books.google.de/books?id=eOI-AAAAcAAJ&pg=PA105
↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 134: https://books.google.de/books?id=qTZDAQAAMAAJ&pg=RA2-PA134