San Pedro Siris

San Pedro Siris (ok kort San Pedro) weer en Dörp in’n Distrikt Cayo von dat Land Belize.

De Oort leeg in de Yalbac Hills in’n Noorden von’n Distrikt üm un bi dor, wo vondaag La Gracia liggt.

Historie

De Oort is in dat 19. Johrhunnert von Mayas grünnt worrn, de vör’n Kastenkrieg ut Mexiko flücht sünd, nadem de Cruzob 1857 un 1860 den Oort Chichanha överfullen harrn.^[1] De eerste Nawies, dat de Oort bestünn, stammt von 1862.^[1] De Oorwoold von de Yalbac Hills weer unbewahnt un is to de Tied ok von de Mahagoni-Holtfällers, de annerwegens in Brietsch-Honduras aktiv weren, noch kuum bruukt worrn.^[1] Dorüm hebbt de Mayas dor Dörper grünnt (blangen San Pedro Siris ok San Jose Yalbac, Xaxe Venic un en poor lüttjere Dörper, de tohoop de Grupp von de „San Pedro Maya“ billt hebbt) un Bueree na dat Milpa-Verfohren bedreven.^[1] Dat Land weer aver kort vörher dör dat Honduras Land Titles Act von 1858/1861 an de British Honduras Company (na 1878 Belize Estate and Produce Company, BEPCO) fullen, de dor Mahagoni fällen wull.^[1]

De San Pedro Maya weren twüschen de Kunfliktpartein in’n Kastenkrieg hen- un herreten.^[1] 1866 hebbt se de Överheit von Brietsch-Honduras üm Hülp gegen de Maya-Rebellen von Icaiché beden, aver noch in dat sülve Johr hebbt se brietsche Truppen verdreven, de op San Pedro Siris marscheert sünd.^[1] In’n Februar 1867 hebbt de Briten ünner Robert William Harley to Wraak de Dörper San Pedro Siris un San Jose Yalbac dalbrennt.^[1] 1872 weren de Öörd al wedder bewahnt.^[1] De Maya-Rebellen von Icaiché harrn aver en Hand över de Dörper.^[1]

San Pedro Siris weer de gröttste Oort mank de Maya-Öörd in de Yalbac Hills. Üm 1900 rüm is dat Dörp aver verlaten worrn un San Jose Yalbac weer denn dat Zentrum.^[1]

Footnoten

1. Christine Kray, Minette Church, Jason Yeager: Designs on/of the Land. Competing Visions, Displacement, and Landscape Memory in British Colonial Honduras. In: Legacies of Space and Intangible Heritage: Archaeology, Ethnohistory, and the Politics of Cultural Continuity in the Americas. (Rutgevers: Fernando Armstrong-Fumero, Julio Hoil Gutierrez), University Press of Colorado, 2017, Sied 53ff.