Sir Robert William Harley (* 1829; † 23. August 1892) weer en brietschen Offzeer un Koloniaaladministrater.
Harley is 1829 boren un 1847 as Ensign in de brietsche Armee intreden.[1] Toeerst bi de Royal Newfoundland Companies un denn bi dat 3rd West India Regiment.[2][1] As dat 3rd Regiment 1870 oplööst worrn is, is he in dat 2nd West India Regiment wesselt.[1] He is bet to’n Colonel opstegen. In’n April/Mai 1861 hett he in de Tied von’n Kastenkrieg in Yucatan deent un weer 1863 Kummandör von de West-Division von de brietschen Truppen in Westafrika (gegen dat Aschantiriek).[3][1] In’n Februar 1864 hett he in Gambia fuchten un en Expeditschoon den Gambia-Stroom hooch anföhrt.[1] In’n Februar/März 1867 hett he in Brietsch-Honduras in’n Kastenkrieg as Brigaadgeneraal de Truppen gegen de opstännschen Maya anföhrt.[3][1] Dorbi sünd ünner annern de Dörper San Pedro Siris un San Jose Yalbac dalbrennt worrn.[1]
In Brietsch-Honduras weer he von’n 22. Juni 1871 bet 10. Juni 1872 kommissarschen Vertreder von William Wellington Cairns as Viezguvernör von Brietsch-Honduras. Na siene Tied in Brietsch-Honduras is he na Grootbritannien trügg un ut de Armee rut.[1] He is in’n Koloniaaldeenst wesselt un as Administrater an de Goldküst gahn.[1] Dor weer he von’n 23. November 1872 bet 2. Oktober 1873. He weer as Nafolger von Robert William Keate as Guvernör von de Goldküst vörsehn, wenn Keate wat tostött.[1] As Keate an’n 7. März 1873 doodbleven is, hett Harley dat Amt övernahmen.[1] Dat weer to de Tied von en Invasion dör dat Aschantiriek in de brietschen Koloniaalrebeden.
Von 1875 bet 1877 weer Harley as Nafolger von Herbert Taylor Ussher Viezguvernör von Tobago un 1877 bet 1882 as Nafolger von Cyril Clerke Graham Viezguvernör von Grenada. In düsse Tied weer he von’n 28. September 1881 bet Januar 1882 ok de kommissarsche Vertreder von William Robinson as Guvernör von Barbados.
Von’n 3. August 1883 bet 4. Mai 1883 weer he as Nafolger von Frederick Barlee Viezguvernör von Brietsch-Honduras.
1860 hett Harley Annie Conington freet.[4]
Ehren
Harley is to Königin Victoria ehren Geboortsdag 1869 Companion of the Order of the Bath worrn, to de Königin ehren Geboortsdag 1874 Companion of the Order of St Michael and St George un to ehren Geboortsdag 1883 Knight Commander von’n sülven Orden.
- ↑ a b c d e f g h i j k The Illustrated London News. William Little, 1873, Band 63, Sied 413
- ↑ The London Gazette: The Appointed Organ for All Announcements of the Executive. H.M. Stationery Office, 1847, Sied 3543
- ↑ a b Kelly's Handbook to the Titles, Landed & Official Classes. Kelly’s Directories, 1875, Sied 210
- ↑ Walford’s County Families of the United Kingdom. Walford’s County Families, 1913, Sied 542
