Höpen (hoochdüütsch Höpen) is en lütten Oort in de Gemeen Snevern in’n Landkreis Heidkreis, Neddersassen. Binnen de Gemeen höört de Oort to de polietsche Oortschop Issell.
De Oort liggt in de Lümbörger Heid. Dat Water ut dat Rebeed flütt in’n Westen na de Ruschwe hen af.
De Naveröörd sünd Reinsählen un Baal in’n Noordoosten, Snevern in’n Süden, Hansahlen in’n Süüdwesten un Issell in’n Noordwesten.
In de Franzosentied hett de Oort toeerst 1810 bet 1811 binnen dat Königriek Westfalen to de Mairie Snevern in’n Kanton Soltau höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Lauenbrüch in’n Kanton Töst.
De Oort hett vör 1852 to de Amtsvaagdie Snevern in dat Amt Rodenborg tohöört, denn von 1852 bet 1859 to dat Amt Snevern un von 1859 bet 1885 to dat Amt Soltau. Na 1885 weer dat in’n Kreis Soltau. 1977 is dat Deel von’n Landkreis Soltau-Fambossel worrn, de 2011 den Naam Landkreis Heidkreis kregen hett.
De Oort hett in dat 19. Johrhunnert toeerst bi de Gemeen Snevern un later bi de Gemeen Issell mit bihöört. De Gemeen Issell is an’n 1. März 1974 mit de Gemeenreform in Neddersassen Deel von de Gemeen Snevern worrn. Sietdem höört de Oort to de Oortschop Issell, de en egen Oortsvörsteiher hett.
Höpen is evangeelsch-luthersch präägt un höört to dat Kaspel von de Peter-un-Paul-Kark in Snevern.
För de Kathoolschen is de St.-Maria-von’n-hilligen-Rosenkranz-Kark in Soltau tostännig.
In Höpen liggt en Freelichtbühn. Siet 1985 warrt dor elk Johr in’n Mai/Juni dat Musikfestival Höpen Air fiert.
För Höpen is de freewillige Füürwehr Issell mit tostännig.
Höpen is över Hansahlen anbunnen an de Landsstraat 171, de in’n Noordoosten na Wintemaur an de Chaussee un dor an de Bundsstraat 3 ran geiht un in’n Süüdoosten över Snevern, Schüllern un Sprengel na Neenkerken.
De nächste Autobahn is de Autobahn 7 (Afsnidd Hamborg–Hannover). De Opfohrt 43a Snevern liggt so 16 Kilometer in’n Süüdoosten von Höpen an de B 3.
De nächste Bahnhoff is so bi dree Kilometer wied weg in’n Süden de Bahnhoff Snevern an de Heidbahn.
In’n Noorden von Höpen liggt de Segelflegerplatz Höpen.
De Kinner gaht op de Grundschool Hansahlen.