Snevern

Wapen/Flagg	Koort
Basisdaten
Bundsland: Neddersassen Landkreis: Heidkreis Gemeen: Snevern
Flach:	28,494 km²
Inwahners:
Hööchd:	97 m över NHN
Postleettall:	29640
Vörwahl:	05193
Geograafsche Laag:	Koordinaten:53° 7′ N, 9° 47′ O53° 7′ N, 9° 47′ O
Laag von Snevern in de Gemeen Snevern (Koort lett sik anklicken)

Snevern (hoochdüütsch Schneverdingen) is de Hauptoort von de Gemeen Snevern in’n Landkreis Heidkreis, Neddersassen.

Bi de Oortschop Snevern höört ok de Öörd Gallhoorn, Hansahlen un Höpen mit bi. Mit düsse Öörd un mit dat Dörp Zoarn is Snevern vondaag tohoopwussen.

Geografie

De Oort liggt in de Lümbörger Heid direkt an’n Westrand von dat Naturschuulrebeed Lümbörger Heid. Dat Pietzmoor liggt in’n Süüdoosten. Dat Water ut dat Rebeed flütt in’n Süden över de Veers af un in’n Noordoosten över’n Osterwe’er Beek na de Ruschwe.

De Naveröörd sünd Hansahlen, Höpen un Wintemaur-Gäbesdörp in’n Noorden, Reinsählen, Baal, Habenbeck-Nerndörp un Habenbeck-Bobendörp in’n Noordoosten, Wulfsbarg, Tütsbarg, Benninghöben un Behrn in’n Oosten, Bockhäbe, Schaal, Häbe, Möhr un Pietz in’n Süüdoosten, Hämsen, Langloh, Dannhost, Wieckhost un Gallhoorn in’n Süden, Stimbeck, Hasselhoff, Vöden un Schüllern in’n Süüdwesten, Lünzenbrookhoff, Zoarn un Lünzen in’n Westen un Schultenwe, Grotenwe, Osterwe un Issell in’n Noordwesten.

Historie

Stadtborn von Frijo Müller-Belecke

In dat Johr 1231 is Snevern eerstmals oorkundlich nömmt wurrn. De Bischop Iso vun Veern hett do den Ministerialen Lippold von Zahrenhusen dwungen, up de Vaagdie „Snewordinge“ to verzichten.

In dat 19. Johrhunnert is in Snevern veel Ledder verarbeidt worrn, ut dat ünner annern Schoh herstellt worrn sünd. To de besten Tieden harr Snevern över 300 Schohmakers. Vondaag is dor blots noch een Bedriev von nableven.

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Snevern in’n Kanton Soltau höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Lauenbrüch in’n Kanton Töst.

De Oort hett vör 1852 to de Amtsvaagdie Snevern in dat Amt Rodenborg tohöört, denn von 1852 bet 1859 to dat Amt Snevern un von 1859 bet 1885 to dat Amt Soltau. Na 1885 weer dat in’n Kreis Soltau. 1977 is dat Deel von’n Landkreis Soltau-Fambossel worrn, de 2011 den Naam Landkreis Heidkreis kregen hett.

De Oort weer fröher en egenstännige Buurschop, to de ok de Öörd Gallhoorn, Hansahlen, Höpen, Meyerhoff un Zoarn mit tohöört hebbt. De Buurschop Snevern is 1852 in de twee egenstännigen Gemenen Zoarn un Snevern deelt worrn. De Gemeen Snevern is an’n 1. März 1974 mit de Gemeenreform in Neddersassen Deel von de düüdlich vergrötterte Gemeen Snevern worrn. Sietdem billt dat ole Snevern binnen de Gemeen en Oortschop, de aver nich dör en egen Oortsraad oder Oortsvörsteiher vertreden warrt.

Inwahnertall

Johr	Inwahners
1791-00-001791[1]	36 Füürsteden
1812-00-001812[2]	314
1824-00-001824[3]	49 Füürsteden
1848-00-001848[4]	496 Lüüd, 55 Hüüs
1871-12-011. Dezember 1871[5]	756 Lüüd, 122 Hüüs
1885-12-011. Dezember 1885[6]	922 Lüüd, 150 Hüüs
1905-12-011. Dezember 1905[7]	1.840 Lüüd, 291 Hüüs
1910-12-011. Dezember 1910[8]	2.306
1925-00-001925[9]	2.472
1933-00-001933[9]	2.981
1939-00-001939[9]	3.271

Religion

Peter-un-Paul-Kark

St.-Ansgar-Kark

Snevern is evangeelsch-luthersch präägt un billt mit de Peter-un-Paul-Kark en egen Kaspel. Fröher leeg ganz Snevern in düt Kaspel. In dat 20. Johrhunnert is aver de Deel in’n Oosten von de Gleise von de Heidbahn en egen Karkengemeen worrn. Sietdem billt düt Rebeed de Markus-Karkengemeen mit de Een-Welt-Kark.

För de Kathoolschen is de St.-Ansgar-Kark in Snevern tostännig, de siet 1. November 2006 to de St.-Maria-Karkengemeen in Soltau tohöört. De St.-Ansgar-Kark is 1963 boot un an’n 1. Januar 1964 egenstännige Karkengemeen worrn. Vörher is dat Rebeed ok al von de St.-Maria-Kark in Soltau betreut worrn.

In Snevern gifft dat ok en neeapostoolsche Gemeen un de Christusgemeen von’n Bund Freekarkliche Pingstgemenen.

Dat gifft in Snevern twee Karkhööv: den Olen Karkhoff an de Bargstraat/Ooststraat un den Ne’en Karkhoff an de Straten An’n Karkhoff/Kulenkamp.

Kultur

En Denkmaal för de Fullenen ut’n Krieg von 1870/1871 un de twee Weltkrieg’ steiht in Snevern an’n Ne’en Karkhoff.

Siet 1922 warrt in Snevern en Heidkönigin küürt.

Siet 2007 warrt in’n Handball de Internatschonale Heid-Cup utspeelt.

Verenen

De Schüttenvereen Snevern is 1848 grünnt worrn un de Sportvereen TV Jahn Snevern 1902.

Weertschop un Infrastruktur

Snevern hett en egene freewillige Füürwehr, de an’n 3. August 1895 grünnt worrn is.

Verkehr

In Snevern krüüzt sik de Landsstraten L 170 un L 171. De L 170 löppt in’n Süüdoosten na Häbe an de Bundsstraat 3 un in’n Westen över Lünzen un Grauen na Hemslingen an de B 71. De L 171 geiht in’n Noordoosten na Wintemaur an de Chaussee un dor an de B 3 un in’n Süüdwesten över Schüllern un Sprengel na Neenkerken. De Kreisstraat 30 föhrt von Zoarn in’n Noordwesten över Grotenwe an Fintel langs na Lauenbrüch un de K 31 över Issell na Wessloh. De K 53 löppt in’n Oosten na de B 3. De K 33 geiht von Zoarn in’n Süüdoosten över Gallhoorn, Hämsen un Gröps na Woltern.

De nächste Autobahn is de Autobahn 7 (Afsnidd Hamborg–Hannover). De Opfohrt 43a Snevern liggt so 15 Kilometer in’n Süüdoosten von Snevern an de B 3.

De Bahnhoff Snevern liggt an de Heidbahn.

Ünnernehmens

In Snevern produzeert dat Ünnernehmen Bisquiva GmbH & Co. KG, dat bet 2009 Gottena heten hett. Dat Ünnernehmen höört to de Bahlsen GmbH und Co. KG. Dat Ünnernehmen Smurfit Kappa bedrifft en Wark in Snevern.

Aver ok de Frömmenverkehr in de Lümbörger Heid is för Snevern wichtig.

Scholen

Stadtbökeree in de „Ole School“

Snevern hett dree Grundscholen: de Grundschool Hansahlen, de Grundschool an’n Oosterwald un de Grundschool an’t Pietzmoor. Nadem se mit de Grundschool trech sünd, köönt de Kinner op de Kooperative Gesamtschool Snevern wesseln. Tosätzlich gifft dat teihn Kitas.

In de „Ole School“ in de Schoolstraat is siet 1983 de Stadtbökeree ünnerbrocht. De Bökeree is 1955 grünnt worrn,

Literatur

• Gerhard Röper: 750 Jahre Schneverdingen. Mit einem Beitrag von Wilhelm Thömen. Stadt Snevern, Snevern 1981
• Walter Peters: 40 Jahre Schneverdingen. 1946–1986. Fakten Daten Bilder. Eine Dokumentation. Stadt Snevern, Snevern 1987

Footnoten

1. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 204
2. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 61
3. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 546
4. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 153
5. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 93
6. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 102
7. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 154
8. Inwahnertallen op gemeindeverzeichnis.de
9. Inwahnertallen op verwaltungsgeschichte.de

Oortschoppen in de Gemeen Snevern

Ehrhoorn | Grotenwe | Häbe | Issell | Langloh | Lünzen | Snevern | Schüllern | Wessloh | Wintemaur | Zoarn