De Oort liggt op en Geestinsel twüschen de Mooren langs de Luun, de Dohrener Beek un den Lox-Düringer Moorkanaal. Dat Water ut dat Rebeed warrt över Gravens na Luun un Lox-Düringer Moorkanaal afföhrt.
De Oort weer fröher en egenstännige Gemeen un von 1971 bet 1974 Maat von de Samtgemeen Lox. De Gemeen is an’n 1. März 1974 mit de Gemeenreform in Neddersassen Deel von de Gemeen Lox worrn. Sietdem billt Düring binnen de Gemeen Lox en Oortschop mit egen Oortsvörsteiher.
Dat Wapen von Düring wiest op sülvern Grund dree rode Köpp von Schaapbück, twee baven von en blauen Balken un een dor ünner.
Utklamüsert het dat Wapen de Heraldiker Gustav Völker. Dat wiest dat Wapen von de Familie von Düring.
Oortsvörsteihers
opstunns: Manfred Koppe
Kultur
En Denkmaal för de Fullenen ut de twee Weltkrieg’ steiht in Lox bi de Kark.
Verenen
De Schüttenvereen Düring is 1951 grünnt worrn un de Turn- un Sportvereen 1896.
Weertschop un Infrastruktur
Düring hett en egene freewillige Füürwehr, de an’n 3. April 1902 grünnt worrn is. Dat weer en Turner-Füürwehr, de ut’n Turnvereen rut grünnt worrn is. Vör 1902 harr dat al en Plichtfüürwehr geven. An’n 8. April 1934 is de Turner-Füürwehr in en normale freewillige Füürwehr ümwannelt worrn.
En beten buten dat Dörp gifft dat op’n Hoff Düring en Inrichtung för suchtkranke Minschen.
To de grötteren Ünnernehmens in Düring höört de Slachthoff Düringer Fleischkontor Engelbert Stukenborg.
Verkehr
Von Düring löppt de Kreisstraat 56 in’n Noordwesten na Lox an de Landsstraat 143, de in’n Noordoosten na Bexhöv (dor Krüzung mit de Bundsstraat 71), Donnern un Sellst geiht un in’n Süüdwesten na Ness un Stotel un dor in de B 437 övergeiht. In’n Noordoosten gifft dat noch en lüttjere Straat na Stinst, de an de B 71 föhrt. De B 71 löppt in’n Noordwesten na Bremerhoben-Wulsdörp un in’n Oosten na Beverst un Bremervöör.
De Kinner ut Düring gaht na de Heinrich-Luden-School in Lox op Grundschool. De Volksschool in Düring hett 1975 dichtmaakt. Se is 1822 nee boot worrn, dör de Stiftung von Georg Lilckendey, de ut Düring stammen dee un in London as Zuckerfabrikant to Geld kamen weer.
↑Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 163
↑Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 50
