Wiemsdörp (hoochdüütsch Wiemsdorf) is en Dörp in de Gemeen Lox in’n Landkreis Cuxhoben, Neddersassen.
Geografie
Wiemsdörp liggt in de Masch op dat rechte Över von de Werser.
De Naveröörd sünd Overwarfersiel un Overwarf in’n Noorden, Fleest in’n Noordoosten, Ness un Stotel in’n Oosten, Maihusen un Büttel in’n Süüdoosten un Deesdörp un Eidewarden in’n Westen.
Historie
Wiemsdörp kummt 1105 toeerst in de Oorkunnen vör.
In Wiemsdörp hett dat 1808 brennt. Dor sünd 22 Wahnhüüs un jüstso veel annere Gebüüd bi dalbrennt un fiev Lüüd bi doodbleven.
Wiemsdörp hett fröher to de Gemeen Deesdörp, Amt Braak, in dat Land Ollnborg tohöört, de an’n 1. Januar 1936 in Landwörden ümdööpt worrn is. Von 1933 bet 1939 weer dat Deel von dat Amt Wersermasch, denn hett dat Amt den ne’en Naam Landkreis Wersermasch kregen.
1974 is de Gemeen Wiemsdörp mit de Gemeenreform in Neddersassen Deel von de Gemeen Lox worrn un is dor denn ok von’n Landkreis Wersermasch na’n Landkreis Wersermünn un 1977 na’n Landkreis Cuxhoben wesselt. Vondaag billt dat binnen de Gemeen Lox en Oortschop mit egen Oortsvörsteiher.
In’n Eersten Weltkrieg sünd teihn Soldaten ut Wiemsdörp fullen oder vermisst, un in’n Tweten 15[1].
Dat öllste Huus von Wiemsdörp is 1638 boot worrn.
Inwahnertall
| Johr |
Inwahners
|
| 1788-00-001788[2] |
327*
|
| 1845-00-001845[3] |
29 Hüüs, 161 Lüüd**
|
| 1868-00-001868[4] |
161 ***
|
- * Minoort is dor mittellt
- ** ahn Minnoort, dat to de Tied 25 Hüüs un 118 Inwahners hett
- *** ahn Minnoort mit 152 Lüüd
Religion
Wiemsdörp is evangeelsch-luthersch präägt un höört to dat Kaspel von de Laurentius-Kark in Deesdorp.
Oortsvörstänn
- -2010: Hartwig von Oehsen
- 1. Januar 2011-: Torsten Radespiel
Kultur
En Denkmaal för de Fullenen ut de twee Weltkrieg’ steiht in Deesdörp bi de Kark.
Infrastruktur
Verkehr
Von Wiemsdörp gifft dat lüttjere Straten na Deesdörp, Maihusen un an de Landsstraat 121 ran, de in’n Süden, so bi 500 m von’t Dörp af, an de Bundsstraat 437 anslütt. De B 437 löppt in’n Oosten an de Autobahn 27, de so fiev Kilometer weg is. In’n Westen geiht de B 437 dör den Wersertunnel ünner de Werser langs na Butjadingen an de B 212 ran.
De nächsten Bahnhööv sünd de Bahnhoff Lox an de Bahnlien Bremen-Cuxhoben un de Bahnhoff Lüttjensiel an de Bahnlien Huud-Noordenham.
- ↑ http://www.denkmalprojekt.org/2009/loxstedt-dedesdorf_wk1u2_ns.htm
- ↑ Oldenburgischer Staatskalender. 1848, Sied 222: http://books.google.de/books?id=-4YAAAAAcAAJ&pg=PA222
- ↑ Johann Friedrich Kratzsch: Neuestes und gründlichstes alphabetisches Lexicon der sämmtlichen Ortschaften der deutschen Bundesstaaten. 1845, Sied 784, http://books.google.de/books?id=deiPxEcdQbgC&pg=PA784
- ↑ Karl Georg Böse: Das Grossherzogthum Oldenburg: topographisch-statistische Beschreibung desselben. 1863, Sied 229, http://books.google.de/books?id=22AAAAAAcAAJ&pg=PA229
